Sindikata e Pavarur e Sektorit Privat të Kosovës ia ka dërguar një kërkesë së fundmi Komisionit për Shëndetësi dhe Mirëqenie Sociale, shkruan InLajmi.
Këtë e ka bërë me dije kryetari i kësaj Sindikate, Jusuf Azemi në një prononcim për Gazetën InLajmi derisa ka theksuar se punëtorët e sektorit privat të Kosovës po ballafaqohen me probleme të shumta.
Azemi më tej, tha se në takimin që kanë kërkuar me përgjegjësit pritet të flasin për tejkalimin e pengesave në punët e përditshme për punëtorët e sektorit privat të Kosovës.
Por, kjo sindikatë, sipas Azemit disa herë i ka shkruar dhe kërkuar takim Qeverisë së Kosovës, edhe për pagën minimale.
Derisa kryeministri Kurti është zotuar për ngritjen e pagës minimale nga 170 sa është ne 264 euro, sipas Azemit, kjo pagë nuk mbulon minimumin e mbijetesës.
“Paga minimale prej 264 eurosh nuk mbulon as minimumin e minimumit të mbijetesës, sipas një llogarie që e kemi bërë ne, 460 euro janë vetëm për ushqim edhe atë me byrek, pra për 4 anëtarë nga 50 euro rrymë”, tha Azemi.
Por, një takim për të diskutuar lidhur me pagën minimale, Azemi thotë se e kanë kërkuar disa herë nga Qeveria e Kosovës por deri më tash ka rënë në ‘vesh të shurdhër’.
“Për pagat i kemi shkruar disa herë Qeverisë së Kosovës dhe i kemi shpjeguar pse duhet të jetë 400 euro. Por, nuk kemi marrë përgjigje deri më tash. Ne nuk i kemi caktuar afat qeverisë por afat duhet të kenë pronarët e kompanive. Nuk ka më nënshkrim të kontratave nën pagën 400 euro. Bile, kemi rekomanduar që Qeveria e Kosovës të mos merret me pagën minimale, atë e bënë punëdhënësi dhe punëmarrësi. Ne kemi rekomanduar që Qeveria ta bëj mbikëqyrjen apo monitorimin e marrëveshjeve apo kontratave të nënshkruara mes punëdhënësit dhe punëmarrësit”, shtoi më tej Azemi./InLajmi/
