Një numër i konsiderueshëm i banorëve të komunës së Prishtinës shërbimet i kryejnë në QKUK, të udhëzuar nga Qendrat e Mjekësive Familjare, krejt kjo për shkak të mungesë së një spitali të qytetit
Ndonëse, ndërtimi i tij është tashmë edhe pjesë e ligjit për kryeqytetin, projekti për të është ende në fazën e studimit të fizibilitetit.
Nga Ministria e Shëndetësisë thonë se ende nuk ka përfunduar studimi i fizibilitetit, të cilin janë duke e kryer përfaqësuese të kompanisë gjermane ICME “Andrea Kdolsky”, studim ky që pritej të përfundohej brenda gjashtë muajve.
Ndërsa, komuna e Prishtinës thotë se pa u përfunduar studimi i fizibilitetit nuk mund të vazhdohet me fazat e tjera të këtij projekti.
“Ministria e Shëndetësisë është në proces të hartimit të planit të fizibilitetit, në mënyrë që të vazhdohet me fazat e tjera të këtij projekti”, thuhet në përgjigjen e komunës së Prishtinës.
Ministri i Shëndetësisë, Uran Ismaili, së bashku me ministrin e Administratës Publike, Mahir Yagcilar, gjatë muajit prill kishin nënshkruar marrëveshje për fillimin e ndërtimit të Spitalit të Prishtinës.
Për këtë, ministria e Administratës Publike kishte ndarë 500 mijë euro. Por edhe pse janë bërë gjashtë muaj, këto procedura nuk kanë përfunduar ende.
Në MSH thonë se kompania gjermane përveç studimit të fizibilitetit do të hartojë edhe planin detal të këtij projekti.
“Sipas memotandumit të Bashkëpunimit MSH-MAP, projekti do të realizohet në katër faza: 1. Realizimi i Studimit të Nevojave dhe Vlerësimit të Kapaciteteve; 2. Themelimi i Spitalit të përgjithshëm të kryeqytetit, ashtu siç përcaktohet me Ligjin për Kryeqytetin; 3. Hartimi i projektit detal për ndërtimin në bazë të Studimit; 4. Ndërtimi i objektit në bazë të projektit detal si dhe mbikëqyrja profesionale e fazës së ndërtimit”, thuhet në përgjigjen e zyrës për informim në MSH, shkruan, Lajmi.net
Ndërtimi i këtij spitali sipas MSH-së pritet të përfundojë deri në vitin 2021. Për realizimin e tij të ndarë janë 7 milionë euro, me mundësi shtimi të buxhetit nëse studimi i fizibilitetit thotë se ai do të kushtojë më shumë.
