Operimi i taksive ilegale në kryeqytet është mjaftë i pranishëm. Shpesh herë për komunikacion të mbingarkuar në Prishtinë akuzohen këta persona që e ushtrojnë këtë veprimtari ilegalisht.
Mirëpo nuk janë të pakët njerëzit të cilët preferojnë që të udhëtojnë me taksitë ilegale për arsye se çmimi i tyre është më i lirë sipas qytetarëve.
Një qytetar i cili deshi të mbetet anonim tha për InLajmin, se udhëton shpesh me këta taksi për arsye se çmimi është shumë më i lirë se i taksive tjerë që veprojnë me kompani.
“ Po udhëtoj me taksi që veprojnë ilegalisht, mendoj që janë më të lirë se këta taksitë që janë me kompani”, tha qytetari.
Një qytetare tjeter tha se ajo personalisht nuk udhëton me këta taksi për arsye se nuk ndihet e sigurt.
“ Nuk udhëtoj shumë shpesh me këta taksi, mendoj qe nuk janë shumë të sigurt. Po i kanë çmimet më të lira”, tha E.B.
E Sabri Gashi, taksist në Prishtinë thotë për InLjamin, se taksitë që operojnë ilegalisht në kryeqytet po e pengojnë punën e tyre.
“Këta taksitë ilegal që nuk kanë leje nga komuna, na pengojnë sepse Ne secili e kemi vendin tone, shpesh ata hynë pa rend, kështu që po krijohet tollovi këtu mes taksistëve”, tha taksisti Gashi.
Ai tutje shtoi se për të punuar si taksist në kryeqytet, duhet që çdo 6 muaj të marrin leje nga komuna si dhe të bëjnë kontrollin teknik të veturave me të cilat ata punojnë.
“Lejen nga komuna e kemi marrë moti, lejen duhet me vazhdu çdo 6 muaj si dhe me bërë kontrollin teknik të veturës, pasi aplikimit brenda 5 ditëve na lëshohet leja e qarkullimit si taksi, çmimi është 50 cent për person brenda Prishtinës”, shtoi tutje Gashi.
Më herët pagesa për tu pajisur me leje të çarkullimit si taksistë ka qenë 100 euro në vit, mirëpo tani ata duhet vetëm të vazhdojnë lejen çdo 6 muaj dhe të paguajnë vetëm për shpenzimet administrative, asgjë tjetër shtesë.
Drejtori i Inspektoriatit nga Komuna e Prishtinës, Adonis Tahiri tha për InLajmin, se në raste të evidentimit të taksive ilegale në kryeqytet merren masa.
“Përjashtohen nga komunikacioni (duke iu konfiskuar targat, ose vetura), si dhe gjobitën në vlerë prej 100 eurosh”, tha Tahiri.
Ai tutje shtoi se numri i taksive ilegale ka rënë dukshëm, mirëpo ka raste të njëjtit kthehen në rrugë pasi që i kthehen targat e automjetit.
“Numri është dukshëm me i vogël, mirëpo problemi qëndron se pas pagesës se gjobës ne jemi të detyruar t’ia kthejmë targat ose automjetin (varësisht çka konfiskohet) dhe i njëjti mund të del serish në rrugë. Për këtë arsye ka nevojë për inspektim të vazhdueshëm”, shtoi Tahiri.
Komuna e Prishtinës është në bashkëpunim të vazhdueshëm me Policinë e Kosovës, ku në raste të evidentimit të taksive ilegale, me kërkesë të komunës ndërhynë polica./InLajmi/