Shkruan: Blerim Valla
Qendra Kombëtare e Poetëve, Shkrimtarëve dhe Artistëve “Gjakova”, në bashkëpunim me Drejtorinë për Kulturë, Rini e Sport, organizoi promovimin e romanit me titull, “Atë natë bunarët kanë gjëmuar”, të autores, Dr. Resmije Kryeziu, Ky promovim u mbajt në shenjë nderimi e respekti në 80-vjetorin e lindjes së profesoreshës, studiueses dhe shkrimtares së njohur, e njërës prej albanologeve më të çmuara të Kosovës.
Kumtesat e tyre për romanin i lexuan, Prof. dr. Hysen Matoshi dhe Mr. Kadrush Radogoshi! Filimisht një fjalë përshëndetëse e pati Mevlyde Mezini – Saraçi kryetare e Qkpsha “Gjakova” e cila përshëndeti autoren Dr. Resmije Kryeziu dhe bashkëshortin e autores së romanit, profesorin, regjisorin, dramaturgun, veprimtarinë e çështjes kombëtare, ish – të burgosurin politik, Ekrem Kryeziun. “Autorja Dr. Resmije Kryeziu në tetëdhjetë vjetorin e lindjes së saj, nxori në dritë romanin me titull, “Atë natë bunarët kanë gjëmuar”, romani më i ri i autores, Dr. Resmije Kryeziu.
“Romani i cili po promovohet sot në Gjakovë, pikërisht në vendin ku janë zhvilluar ngjarjet historike dhe tematika e shtjelluar në përmbajtjen e romanit. Në momente të caktuara e kam përjetuar veten si pjesëmarrëse e ngjarjeve të shtjelluara në roman, në fakt më është dashur kohë të rikthehem në faqet vijuese. Fatkeqësisht historia e popullit shqiptar po përsëritet ndaj mendoj ky roman përveç se lexuesit ia zhvillon mënyrën e të menduarit ia kthen edhe kujtesën historike, të vetëdijeson si njeri, si shqiptar për borxhin që ia kemi atdheut pa marrë parasysh çmimin” tha znj. Saraçi.
Për romanin “Atë natë bunarët kanë gjëmuar” të autores, Dr. Resmije Kryeziut me recensionet e tyre kanë folur Dr. Hysen Matoshi dhe Mr. Kadrush Radogoshi të cilët e çmuan lart punën dhe krijimtarinë e autores Kryeziu, duke e cilësuar romanin një kontribut të rëndësishëm në letërsinë bashkëkohore shqipe. Dr.Hysen Matoshi, studiues i letërsisë shqiptare dhe Mr. Kadrush Radogoshi shkrimtar dhe kritik letrar vlerësuan në vlerat letrare artistike dhe në temën që trajton romanin më i ri i R. Kryeziut. Sidomos në faktorin dokumentar historik dhe periudhën që trajton ky roman. Duke u përqendruar në segmentet e caktuara të vlerave letrare artistike të romanit. I cili si subjekt dhe protagonistë të romanit janë pjesëtarët e familjes Kryeziu, njërës ndër familjet emblemë e shqiptarëve, që përfunduan tragjikisht në bunarët e Hereqit nga dora mizore e partizanëve serbo- kosovarë.
Resmije Kryeziu është autore edhe e dy romaneve të tjera: “Rrota e ujit” dhe “Nën saç”, që u botuan kohë më parë. Në këtë promovim du referuesit Matoshi e Radogoshi pos tjerash theksuan rolin e saj të veçantë të R. Kryeziut në zhvillimin e studimeve albanologjike dhe në pasurimin e letërsisë shqiptare. Veprat e Resmije Kryeziut përfaqësojnë një ndër zërat më të veçantë në studimin e letërsisë shqipe. Ajo ka lënë gjurmë të thella në studimet albanologjike, si njëra ndër gratë e para studiuese në Kosovë, me librin e njohur studimor “Peronazhi i gruas në letërsinë shqipe mes dy luftërave botërore”, i cil përbën kulmin e hulumtiveve të saj shumëveqare për këtë temë të rëndësishme të letërsisë shqiptare.
Ndërkaq tri romanet e saj janë dëshmi historike dhe ngjarje të përjetuara nga ajo vet. Botimi i romanit të saj të parë “Rrota e ujit” ishte befasi e këndshme jo vetëm për lexuesit por edhe për shumë njohës të krijimtarisë të cilët e njihnin kryesisht si studiuese e letërsisë. Vlerësimi i lartë që iu bë romanit të saj të parë ” Rrota e ujit” nga kritika ishte shtytje që më pas ajo doli para lexuesve edhe me dy romane të tjera “Nën saç” dhe “Atë natë edhe bunarët kanë gjëmuar”.
Vetë autorja R. Kryeziu, në fjalën e saj, falënderoi QKPAGJ për këtë promovim dhe dy referuesit që folën për romanin e saj që përçon tematikë nga vendlindja, shoqëria dhe zhvillimet e kohës, ka thënë ajo. Përndyshe Resmije Kryeziu ka lindur në Gjakovë në vitin 1945. Shkollën fillore e kreu në vendlindje, shkollën e mesme në Pejë, ndërsa studimet universitare dhe pasuniversitare në Degën e Gjuhës dhe Letërsisë Shqipe në Universitetin e Prishtinës. Ka punuar si mësimdhënëse e gjuhës shqipe dhe më pas si gazetare në të përditshmen “Zëri i Rinisë”. Prej vitit 1977 e deri në pensionim, ka qenë këshilltare shkencore në Institutin Albanologjik të Prishtinës.
Krahas punës kërkimore, Kryeziu ka botuar edhe dhjetëra vepra letrare dhe studimore, ndër to: “Personazhi i gruas në letërsinë shqipe në mes të dy luftërave botërore”, “Femina Litterarum”, “Akti i krijimit”, “Nga Lindja në Perëndim”, “Rrota e ujit”, “Nën saç” dhe “Atë natë bunarët kanë gjëmuar”./InLajmi/
