Këngëtari i njohur shqiptar, Ilir Shaqiri, ka vendosur të tërhiqet zyrtarisht nga skena artistike. Lajmi u bë i ditur përmes një postimi të veçantë emocional të djalit të tij, Korab Shaqiri, i cili ka uruar babain me rastin e ditëlindjes së 65-të.
Në dedikimin e publikuar, Korabi shpreh respektin dhe mirënjohjen e tij për kontributin e jashtëzakonshëm të babait në muzikën shqiptare. Ai thekson se edhe pse Iliri hyn në moshën e pensionit, ai mbetet një figurë që “nuk plaket kurrë”, pasi zëri dhe këngët e tij kanë ndriçuar artin shqiptar dhe kanë lënë gjurmë të paharrueshme në kulturën tonë.
“Gëzuar ditëlindjen e 65-të, babë i dashur, Ilir Shaqiri. Edhe pse sot jam larg, zemra ime rri gjithmonë pranë teje, pranë zërit tënd që më rriti, këngëve të tua që u bënë histori, e shpirtit tënd që nuk njeh lodhje. Ti je nga ata burra që nuk plaken kurrë, sepse jetojnë në ndriçimin e artit, në thirrjen e misionit, në amanetin e këngës. Dhe vërtet, nuk ka pensionim për artistin, jo për një artist si ti, që ka vënë dritë e krenari në çdo shtëpi shqiptare”, shkruan Korabi.
Ai gjithashtu falënderon babanë për sakrificat, këshillat dhe shembullin që i ka dhënë gjatë gjithë jetës, duke theksuar se kontributi i Ilir Shaqirit do të mbetet i pavdekshëm në çdo shtëpi shqiptare, shkruan Telegrafi.com
Me këtë postim emocionues, fansat dhe publiku shqiptar kanë ripërsëritur vlerësimin për një nga zërat më të dashur të muzikës shqiptare, i cili me këngët e tij ka shoqëruar gjenerata të tëra dhe ka lënë një trashëgimi të paharrueshme artistike.
