Shkruan : Blerim Valla
Petrit Çarkaxhiu, një fenomen muzikor, një kompozitor i kompletuar dhe një këngëtar i njohur cili ka shkruar shumë këngë hite në muzikën rock me grupin e tij të famshëm “Jericho”, ka mbajtur një solo koncert akustikë live, krejtësisht të zhanrit tjetër! Ky koncert u mbajt në kuadër të festivalit “Ditët e Nëntorit” që po mbahet qe dy javë në Gjakovë.
Çarkaxhiu gjatë koncertit të tij me tekstet dhe meloditë e tija bëri një udhëtimit muzikor që ka të bëjë me muzikën sufi e cila ka të bëjë me njerëzit, shpirtrat dhe ekzistencën e tyre, i frymëzuar nga muzikantët turq. Ai është frymëzuar gjatë qëndrimit të tij në Turqi për studime të doktoraturës për arqitekturë në kohën e covidit. Dhe atje ai komponoi 11 këngë, 8 prej të cilave ju ka bërë edhe videoblipet e së shpejti pritet ti kompletoj të gjitha në një album. Çarkaxhiu i cili ka filluar të bëj muzikë në vitet 1990 me një grup roku të quajtur “Jericho” dhe që atëherë, ka sintetizuar muzikën popullore shqiptare me muzikën rock dhe elektronike, por që më vonë e ka filluarr jë projekt solo në Stamboll. Projekti u përfundua tërësisht në Stamboll dhe u regjistrua në një studio atje. Dhe nga kjo vërehet se muzika turke nuk është e huaj për shqiptarët, pasi veçanërisht muzika sufiste dhe muzika folklorike e jonë kanë shumë të përbashkëta ku përdoren instrumentet si çiftelia, defi dhe davuli, njëjtë siç përdoren edhe në Turqi.
Muzika e Çarkaxhiut e interpretuar në këtë koncert (përpos tri këngëve rock që ai i këndon me grupin “Jericho”) është muzikë sufi një zhanër muzikor shumë i fuqishëm shpirtërisht që prek shpirtin njerëzor që është shumë frymëzuese për dëgjuesit (publikun) dhe ka të bëj me njerëzit, por edhe me vet jetën dhe me shpirtrat e tyre. Gati të gjitha këngët e kënduara Petriti i ka realizuar vetë muzikën dhe tekstet, përpos dy këngëve tekstet e të cilave i ka shkruar poeti i njohur Fahredin Shehu (i cili ishte edhe mysafir i këtij koncerti). Për gati 1 orë e 30 minuta publiku i shumtë që kishte mbushur sallën e pallatit të kulturës në Gjakovëv u futën në botën shpirtërore – të brendshme të njërit prej zërave më autentikë të muzikës jo vetëm rock shqiptare, por tani edhe të asaj shpirtërore.
Duke kënduar njëzëri me Petritin të gjitha këngët që ai i interpretoi si : Më pastro, Kangë muzgu, Drenushë e trembur,Ti je fryma n’zemrë time, Ra ni fjollë n’synin tem, Vajza e tokave të diellit, Natë e gatë, Hani me dy porta, Trandofili, Kur do të pushoj kjo kangë, Kanga e ashikut dhe Dul behari. Shkurt, Petrit Çarkaxhiu në Gjakovë preku shpirtrat dhe ndjenjat e publikut me koncertin e tij solistik! Këngëtari i njohur Petrit Çarkaxhiu, vokalisti i grupit Jericho me projektin e tij solo, këtë herë pa anëtarët e tjerë të grupin Jericho, paraqet një hyrje në honet e shpirtit dhe ndjenjave njerëzore. Edhe ashtu nuk mund të prisnim asgjë më pak nga ky artist kaq i madh e që nuk zhgënjen asnjëherë me krijimet e tij.
Ky koncert ishte një punë e fuqishme nga artisti për të sjellë një emocion të thellë tek publiku. Petriti në këtë koncert ishte i shoqëruar nga miqtë e tij – artistë të mirëfilltë si Dalvin Mamusha në violinë, Tanzhu Suleyman në perkusione dhe nga Edon Ramadani në piano. Përndryshe grupi “Jericho” është një rok grup i formuar nga disa të rinj shqiptarë nga Kosova, në maj të vitit 1997 në Prishtinë.
Ky grup njihet per muzikën dhe tekstet e tyre mjaft të veçanta. Muzika e tyre është r zhanrit etno – rok një përzierje e muzikës rok, alternative, elektronike dhe muzikës tradicionale shqiptare e cila është karakteristikë e regjionit te Kosovës dhe Shqipërisë veriore.
Përveç instrumenteve standarde të rokut, ata përdorin edhe instrumente orientale të cilat bëjnë pjesë në muzikën tradicionale shqiptare, siç është tupani, kavalli dhe zurla. Tekstet e këngëve në përgjithësi janë të shkruara në dialektin gegë, i cili flitet në Kosovë, Maqedoni dhe Shqipërinë veriore. Të gjitha këngët e grupit trajtojnë tema sociale, me theks të veçantë për problemet që populli shqiptar i ka pasur dhe vazhdon t’i ketë me qeverisjen e vendit. Grupi “Jericho” njihet për shumë këngë si: ”Zgjohu”, ”Tomlin e nonës”, ”Kur do t’pushojë kjo kangë”, ”Albanian Rhapsody” ” Gegë e Toskë” e shumë të tjera./InLajmi/
