Kur temperaturat fillojnë të rriten, përzgjedhja e veshjeve kthehet në një sfidë të përditshme. Sidomos gjatë atyre ditëve përvëluese, kur ajri bëhet i rëndë dhe mendjen e kemi në një shezlong buzë detit me rroba banje, kombinimi i freskisë me stilin nuk është aspak i lehtë.
Nëse axhenda juaj verore është e mbushur me angazhime dhe kaloni minuta të tëra çdo mëngjes përballë pasqyrës duke u përpjekur të vendosni se çfarë të vishni, mos u shqetësoni, disa truke të thjeshta mode mund t’ju ndihmojnë ta përballoni vapën me rehati dhe elegancë.
Zakonisht, zgjedhjet tona fokusohen në ngjyra të çelëta dhe materiale që i lejojnë lëkurës të marrë frymë. Tonet pastel janë aleatet tona më të mira, ndërsa pëlhurat si linoja, apo sateni kthehen në domosdoshmëri.
Disa këshilla të thjeshta për të përballuar të nxehtin me stil:
Zgjidhni silueta të lirshme dhe pëlhura të lehta
Rrobat që nuk ngjiten pas trupit dhe materialet natyrale si linoja dhe pambuku janë çelësi i freskisë. Lejojnë qarkullimin e ajrit dhe duken gjithmonë të kuruara.
Përqendrohuni te ngjyrat e lehta
Ngjyrat e çelëta reflektojnë rrezet e diellit dhe japin ndjesinë e pastërtisë. Zgjidhni ngjyra të buta si bezhë, blu e hapur, rozë pastel apo të bardhë klasike.
Mos harroni aksesorët si kapele dhe syze dielli
Përveç funksionalitetit të tyre, ata kompletojnë pamjen tuaj dhe shtojnë stil me pak përpjekje.
Mos nënvlerësoni fuqinë e shtresëzimit (layering)
Një këmishë e hollë mbi një kanotierë mbetet gjithmonë ‘cool’.
Thuaji ‘po’ sandaleve dhe këpucëve të hapura
Zgjidhni modele të rehatshme, por që i shtojnë veshjes bukurinë.
