Shkruan: Osman Goranci
Në kuadër të 8 Prillit, Ditës Ndërkombëtare të Romëve, në skenën e Teatrit, “Bekim Fehmiu” në Prizren, mbrëmë në interpretim të aktorëve të teatrit rom, “Nexhip Menekeshe”, u dha Premiera e shfaqjes, “Në kërkim”, një trilogji nga dramat e Bertold Brehtit, shkruan InLajmi.
Artdashësit e shumtë prizrenas të cilën e kishin mbushur sallën e teatrit “Bekim Fehmiu” në Prizren, mbrëmë paten kënaqësinë të përcjellin një lojë të jashtëzakonshme e mbresëlënëse duke u mishëruar fuqishëm dhe thellë me trilogjinë Brehtiane, në regjinë e mjeshtrit Mahir Musliu.
Duke iu qasur problemeve shoqërore dhe të kohës, shfaqja “Në kërkim”, na ktheu në retrospektivë kohore, me disa ngjarje falë Brehtit, njërit nga prijëtarët e dramës moderne, me një shtruarje të bukur skenike, nga regjisori Mahir Musliu, i cili edhe e kishte bërë përzgjedhjen e disa akteve nga dramat e Bertold Brehtit, duke krijuar një trilogji të shkëlqyer, “Në kërkim të drejtësisë, të shkencës dhe të spiunit”. Hiperbolizimi i veprimeve, me plot dramaticitet, si shprehje e organizuar në shumë punkte veprimi që njëkohësisht ishin në funksion të zbërthimin e temës, janë vula regjisoriale e Musliut.
“Kaluam gjashtë muaj nga fillimi i punës në këtë tekst dhe një muaj e dhjetë ditë punë ekipore deri në finalizim e këtij projekti! Nga ajo ditë kam punuar sinqerisht dhe pa pushim për ta bërë këtë punë deri në premierë. Edhe kur kam qenë i lirë, isha i angazhuar në lirinë time, vetëm që shfaqja të dalë sa më mirë, t’ua plotësoj kërkesat e këtij ansambli kompakt, poashtu t’i përmbushë edhe ato kërkesa e përmbushje t’mia” – tha për InLajmin regjisori i talentuar Mahir Musliu.
Në anën tjetër bazuar në konceptin regjisorial, aktorët e përgatitur mirë u dhanë energji peronazheve që i luanin me aq passion e shndërrim, deri në natyralizëm, duke u konvertuar me sukses në problematikat e kohës. Kështu aktorët: Fatmir Menekshe, Daut Qulangjiu, Gjelal Dogani, Benjamin Menekshe, Melisa Menekshi, Gjynejt Kalo, Mijedin Shope, Gynesh Veshall dhe Urma Menekshe, si një ekip i jashtëzakonshëm solli shpirtin dhe emocionin në skenë, duke u duartrokitur gjatë nga publiku që e kishte mbushur sallën e teatrit, “Bekim Fehmiu” në Prizren.
Nga Fatmir Menekshe, kryetar i teatrit rom, “Nexhip Menekshe” në Prizren, për suksesin e kësaj shfaqjeje premierë, kanë kontribuar edhe Burim Mustafa, Drejtor i Teatrit “Bekim Fehmiu”, i cili u ka ofruar në dispozicion hapësirat për prova dhe ndihmë të pakursyer të këtij teatri, pastaj Gezim Sertollaj, koreograf në zë jo vetëm në Prizren, Benjamin Menekshe asistent regjie, Skender Latifi dizajner i dritave, Flamur Krasniqi tonist i shfaqjes, Fikrim Menekshe, ndriçues. Faruk Ibrahimi e Alban Krasniqi.
Në fund të shtojmë se për shkak të interesimit të madh të publikut jo vetëm prizrenass, reprizza e kësaj shfaqjeje do të jepet edhe me 9 prill në teatrin e qytetit Bekim Fehmiu me fillim në orën 20;00 /InLajmi/
