Kualifikueset e Shqipërisë drejt Botërorit 2026 nisën në Angli, por edicioni i vërtetë starton me ndeshjen përballë Andorrës në shtëpi. Kombëtarja ka shansin të marrë fitoren e parë dhe të mbetet në garën për të arritur të paktën vendin e dytë, që përkthehet në zona play-off. Fitorja është detyrim.
“Duhet të fitojmë me patjetër. Kërkojmë tri pikët e para pas humbjes në Angli. Do jetë ndeshje e vështirë, duhet të gjejmë hapësira dhe të arrijmë të zhbllokojmë rezultatin, por edhe të bëjmë kujdes nga kundërsulmet e tyre. Andorra është rival i vështirë. Do të ketë ndryshime sepse është një ndeshje krejt ndryshe nga Wembley. Atje duhej të mbroheshim, tani duhet të sulmojmë. Ekipi duhet të zhbllokohet, të shënojë edhe të provojë ti fitojë ndeshjet”, tha Sylvinho.
Kuqezinjtë nisen favoritë dhe ky është fakt. Lojtarët duhet të përballojnë presionin e një ndeshje ku janë ata që duhet të kontrollojnë lojën.
“Unë për vete jo, edhe atë lojë e konsideroj si mundësi, ne si ekip nuk e mendojmë ashtu. Ishte mundësi për ne, Anglia është ekip botëror, luan për të fituar tituj. Nesër do të jetë një ndeshje tjetër, e vështirë dhe të jenë të përqendruar, por në futbollin e sotëm nuk ka ndeshje të lehta. Unë besoj që ata kanë një përparësi që kanë një trajner prej shumë vitesh, një ekip që luan shumë vite bashkë. Besoj që vështirësia do të jetë në nivelin fizik, se janë shumë të përgatitur dhe rrinë shumë poshtë si mbrojtje dhe duhet të jemi ne ata që duhet t’i vendosim në vështirësi, që t’i vendosim në duele individuale për shokët tanë, që të krijojnë hapësira për shokët, ajo do të jetë pika kyçe”, tha Gjimshiti, shkruan A2cnn.
Trajneri Sylvinho paralajmëroi se për vetë specifikat e sfidës, do ti duhet të bëjë disa ndryshime në formacion, për të prezantuar në fushë një skuadër më sulmuese dhe që do të shënojë.
