Ministrja e Punëve të Jashtme e Kosovës Donika Gërvalla tha se sot u përmbyll edhe një hap gjigant drejt anëtarësimit të plotë të Republikës së Kosovës në Këshillin e Evropës.
Gërvalla tha se hapi i sotëm dëshmon përparimin e jashtëzakonshëm të Kosovës në forcimin e demokracisë, të sundimit të ligjit, të mbrojtjes së të drejtave të të gjithë qytetarëve të saj dhe sidomos të komuniteteve joshumicë.
“Me 131 vota për dhe 29 vota kundër Asambleja Parlamentare e Këshillit të Evropës, pas një diskutimi prej rreth 3 orësh votoi për pranimin e Kosovës në këtë organizatë ndër më të rëndësishme evropiane, respektivisht për t’i rekomanduar Këshillit Ministror, i cili mblidhet pas një muaji, anëtarësimin e Kosovës në KiE. Raporti i raportueses së Asamblesë Parlamentare për procesin e anëtarësimit, znj. Dora Bakojanis, i cili konstaton se Kosova ka plotësuar të gjitha kushtet për pranim në Këshillin e Evropës hasi në mbështetje të gjerë të parpamentarëve nga shtete dhe grupe politike të ndryshme. Hapi i sotëm dëshmon përparimin e jashtëzakonshëm të Kosovës në forcimin e demokracisë, të sundimit të ligjit, të mbrojtjes së të drejtave të të gjithë qytetarëve të saj dhe sidomos të komuniteteve joshumicë”, tha ajo.
Më tej ministrja theksoi se deri në anëtarësimin e plotë të Kosovës në Këshillin e Evropës mbetet edhe shumë punë për të bërë, shkruan Teve1.
“Mirëpo sot është dita për të falënderuar shumë të gjithë ata që na mbështetën nga fillimi në këtë rrugë të vështirë, por edhe të gjithë ata që në fillim ishin hezitues, por më pas na përkrahën dhe ndihmuan me shumë besim edhe energji”, shtoi ajo.
