Deputeti i PDK-së, Ardian Kastrati, e ka kritikuar ashpër ministren e Arsimit, Arbërie Nagavci dhe deputetët e pushteit të cilët i quajti mediokër e e të padijshëm.
Përmes një shkrimi në Facebook, Kastrati e ka akuzuar edhe njëherë pushtetin se e kanë kaluar projektligjin për tekste shkollore “me vota të vjedhura në Kuvend”.
“Të orkestruar nga një ministre mediokre sot në Komisionin për Arsim deputetët e VV-së kaluan projekt-ligjin për tekstet shkollore i cili u kontrabandua nga mazhoranca me vota të vjedhura në Kuvend”, tha ai.
Kastrati bëri të ditur se nëse ky Projektligj kalon edhe në lexim të 2-të, do ta dërgojë atë në Gjykatën Kushtetuese.
“Lufta jonë vazhdon në lexim të 2-të e nëse kalon edhe aty lufta jonë vazhdon në kushtetuese. Nuk ndalemi para një regjimi të kriminalizuar që vjedh vota në kuvend!”, ka shkruar ai, shkruan TV Dukagjini.
Deputeti i PDK-së, tutje është shprehur se me veprimet si ky për tekstet shkollore “ka filluar rrënimi i tempullit të demokracisë nga ata që janë aksidente demokratike brenda tij!”.
