Gjatë ditës së sotme, zëdhënësi i KQZ-së, Valmir Elezi, e ka konfirmuar se anëtarët e KKZ-së në katër komunat veriore, përfaqësues të Listës Serbe kanë dhënë dorëheqje. Të njëjtit, ishin emëruar më parë nga KQZ-ja.
Derisa anëtari i KQZ-së nga Vetëvendosje, Sami Kurteshi, tha se kanë qenë të gatshëm për “befasi” të tilla, por që sipas tij, kjo nuk e pengon fare procesin.
“Ne nuk kemi të drejtë me paragjyku si institucion kushtetues që zhvillon këto procese. Natyrisht që kemi mund ta presim edhe duhet të priten gjithmonë, befasi të tilla, nëse mund të quhet kjo befasi, por kjo nuk e pengon procesin. KQZ-ja është institucion kompetent dhe përgjegjës për zhvillimin e votimeve, zgjedhjeve dhe ne ecim përpara. Ne i kemi komisionet komunale të krijuara, zyrtarët tanë komunalë janë atje të vendosur edhe procedurat ecin sipas planit operativ që e ka KQZ”, tha Kurteshi në emisionin “Ditari”.
Madje ai tha se ky veprim i përfaqësuesve të Listes Serbe ka ardhur pasi sipas tij, ata e kanë kuptuar se nuk mund të zhvillojnë “lojë” siç sipas tij, është zhvilluar disa vite më parë.
“Kjo ka qenë e pritur nga Lista Serbe, se unë mendoj se ata e kanë kuptu se do me thënë lojë më nuk mund të zhvillohet siç është zhvilluar disa vjet të tjera. Dhe asgjë nuk ndryshon absolutish jo, zyratrët komunalë janë atje, komisioni komunal janë në rregull. Unë mund të pres po them pa paragjykime që Lista Serbe se ajo megjithatë është organizatë që nuk është shpallë terorriste, por të gjitha kriteret kur shihen me kujdes ajo në të vërtetë nuk është më parti politike, është organizatë terrorriste”, shtoi Kurteshi.
Ndryshe, Ambasada e Shteteve të Bashkuara të Amerikës (SHBA), ka thënë se i vjen keq për deklaratën e Listës Serbe se do të tërhiqen nga pjesëmarrja në votimin për tërheqjen e kryetarëve të komunave në veri të vendit.
“Qëndrimi i SHBA-së është i qartë dhe i pandryshuar. Ne mbështesim demokracinë e larmishme, gjithëpërfshirëse, multietnike të Kosovës dhe demokracinë e lirë, të drejtë dhe të lirë të Kosovës dhe zgjedhje legjitime që e mbështesin atë. Në përputhje me kërkesat e saj ligjore, Kosova do të mbajë një votim për tërheqjen e kryetarëve më 21 prill në katër komunat në veri të Kosovës”, thuhet në përgjigjen për Tëvë1.
