Kryetari i Komunës së Kamenicës, Kadri Rahimaj ka akuzuar Asociacionin e Komunave të Kosovës, se po refuzon të trajtojë kërkesën për anëtarësim të komunave në veri të vendit.
I njëjti përmes një lidhjeje direkte në Tëvë1, tha se AKK e ka frikën se me anëtarësimin e 3 komunave në Asociacion, atëherë Lëvizjes Vetëvendosje i takon një anëtar në bordin menaxhues.
“Ata duhet të na dërgojnë ose publikojnë fletanëtarësimin dhe të na njoftojnë se kur ka qenë hera e fundit që një organ i komunave në veri të Kosovës ka qenë pjesë e Asociacionit. Halli i tyre s’është vetëm këtu, ata e kuptojnë mirë që me anëtarësimin e këtyre komunave në Asociacion, Lëvizjes Vetëvendosje i takon një anëtar në bordin menaxhues të kësaj OJQ-je, të këtij Asociacioni, prandaj e kanë edhe frikën, derisa me këtë frikë po e shkaktojnë edhe dëmin më të madh ndaj Kosovës. Nëse 3 komunat janë pjesë e Asociacionit, që ne po dyshojmë që s’janë pjesë, e po e faktojmë me dokumente, atëherë le të bëhet Vetëvendosje me një anëtar në bord”, deklaroi Rahimaj në emisionin “Ditari”.
I pari i Kamenicës, shtoi se në mbledhjen e Këshillit të Kryetarëve, kanë paraqitur kërkesën që të futet në rend dite shqyrtimi i anëtarësimit të komunave të veriut të vendit, por sipas tij e njëjta fillimisht u refuzua me debat injorues, derisa më pas partitë e vjetra e kanë pamundësuar të diskutohet për këtë çështje.
“Sot e kemi pasur mbledhjen e Këshillit të Kryetarëve me një rend të ditës shumë të varfër, me ç’rast ne propozuam që vendimet e kuvendeve komunale të komunave në veri të Kosovës, të bëhen pikë e rendit të ditës dhe me këtë bazë të miratohen si të tilla për anëtarësim në Asociacionin e komunave të Kosovës. Fillimisht, kjo ngjalli një debat të një niveli shumë të ulët, një diskutim me përmbajtje injoruese, e më pas nga kryetarët e partive të vjetra u votua që mos të futet as në rend të ditës, e le më të diskutohet për këtë çështje”, potencoi tutje kryetari i Kamenicës.
Rahimaj sot ka shkruar se për 7 muaj bordi i AKK-së nuk ka trajtuar kërkesën e komunave në veri të vendit për anëtarësim.
