Kryesuesi i Këshillit Gjyqësor të Kosovës, Albert Zogaj, tha se efikasiteti i gjyqësorit, cilësia e vendimmarrjes dhe besimi i publikut, janë 3 nga sfidat kryesore të sistemit gjyqësor të Kosovës.
Zogaj tha se të gjitha këto çështje po adresohen, derisa shtoi se efikasiteti i gjykatave gjatë vitit të kaluar është rritur në 100%.
“Ne kemi rritur numrin e gjyqtarëve në 2 vitet e fundit, tani kur po flasim kemi proces të hapur për 32 gjyqtarë të rinj, kemi shtuar numrin e gjyqtarëve në gjykatën e shkallës së dytë dhe gjykatën e shkallës së tretë, kemi rritur numrin e bashkëpunëtorëve profesional dhe të administratës gjyqësore, kemi miratuar plan të veprimit për shpërndarje proporcionale dhe të balancuar të lëndëve në gjykata dhe për herë të parë mund ta konfirmoj me përgjegjësi dhe mbështetur në raportet e vlerësimit me statistika që në vitin 2023 në të gjithë indikatorët e matjes së efikasitetit gjyqësor, sipas standardeve të Këshillit të Evropës, ne kemi shkallë të efikasitetit mbi 100%”, tha Zogaj në Rubikon.
Ndërkaq duke folur për performancën e gjyqtarëve, Zogaj tha se në bashkëpunim me USAID është krijuar një sistem përmes së cilit performanca e gjyqtarëve nuk matet me numrin e lëndëve të trajtuara, por me kompleksitetin e tyre, përcjell Klan Kosova.
“Performanca e gjyqtarëve nuk varet më nga numri i lëndëve, por nga numri i pikëve që grumbullon një gjyqtar, sepse përshembull në një fushë mund të kemi lëndë që marrin dy pikë dhe kemi lëndë që marrin 12 pikë. Gjatë një viti një gjyqtar në sistemin tonë duhet të grumbulloj 1100 pikë, për ta arritur minimumin e asaj që quhet norma e gjyqtarëve dhe varet nga kompleksiteti i çështjeve që ka trajtuar një gjyqtar, apo gjyqtare” tha Zogaj.
