Profesori i marrëdhënieve ndërkombëtare, Afrim Hoti, pas zhvillimeve aktuale në vend me rastin e hyrjes në funksion të rregullores së re të Bankës Qendrore të Kosovës dhe deklaratave të njëpasnjëshme të përfaqësuesve amerikanë, ka deklaruar se partneriteti i palëkundur ka filluar të lëkundet.
“Diplomacia kosovare tash e një kohë është duke u vetëkënaqur me historinë dhe të kaluarën tonë, kur ne kemi hyrë në Shtëpinë e Bardhë dhe kemi pasur dyer të hapura. Shihet nga deklaratat që amerikanët janë goxha kritik dhe partneriteti i palëkundur jo vetëm që ka filluar të lëkundet por edhe ka marrë edhe shkarje serioze çfarë i pamë kohëve të fundit”, ka thënë Hoti për “Info Plus” në RTK.
Ai tutje ka thënë se deklaratat e ambasadorit amerikan, Jeffrey Hovenier, duhet të merren më seriozisht.
“Hovenier nuk është personalitet privat në Kosovë. Zëri, qëndrimi dhe pozicioni i tij nënkupton në mënyrë të saktë pozicionin e Washingtonit dhe qeverisë amerikane. Kur ambasadori amerikan thotë se raportet tona jo që kanë rrezik, por janë prekur dhe do të kenë efekte serioze, mendoj se do të tingëlloja naiv sikur të mendoja një alternativë tjetër. Në fund të fundit, ambasadorët janë zëri i qeverive përkatëse”, ka thënë profesori.
Tutje ai ka specifikuar se dialogu Kosovë–Serbi gjendet në një moment kritik duke pasur parasysh zgjedhjet evropiane dhe amerikane.
“Tash jemi në një moment delikat sepse edhe motorët e diplomacisë së Bashkimit Evropian, duke përfshirë edhe Shtetet e Bashkuara të Amerikës ngadalësohen për faktin se ata orientohen kah qëndrimet e tyre, kah njerëzit e tyre për ta rifitu këtë pozicion”, ka thënë Hoti.
