Ambasada e SHBA në Tiranë ka bërë me dije se sekretari amerikan i Shtetit Anthony Blinken do të zhvillojë një takim edhe drejtues të sistemit të drejtësisë, duke nënkuptuar kreun e SPAK, Altin Dumani.
“Mirë se vjen në Shqipëri, Sekretari Blinken!
Gjatë vizitës së tij të parë në Shqipëri, Sekretari i Shtetit i SHBA, Antony Blinken do të takohet me Presidentin Bajram Begaj, Kryeministrin Edi Rama dhe do të marrë pjesë në një aktivitet të veçantë rinor te Piramida e Tiranës, për të festuar të ardhmen e marrëdhënieve SHBA-Shqipëri. Ai do të takohet gjithashtu me drejtues të sistemit të drejtësisë dhe komunitetin e ambasadës. Na ndiqni përgjatë kësaj vizite historike”, thuhet në një postim të ambasadës, shkruan Euronews.
Në axhendën e publikuar nga DASH nuk parashikohej një takim me kreun e SPAK, Altin Dumani, edhe pse mundësia e një takimi të tillë u përfol për ditë të tëra në mediat shqiptare që pas lajmit se sekretari Blinken do vizitonte vendin tonë.
