Kryeministri i Republikës së Kosovës Albin Kurti, me rastin e 54 vjetorit të Universitetit të Prishtinës tha se është institucioni shkollor më i rëndësishëm në historinë moderne të Kosovës, përcjell InLajmi.
Kurti tha se në këtë universitet janë shkolluar dhe formuar elitat intelektuale, kulturore dhe politike të shoqërisë tonë, që u kanë prirë proceseve për progres shoqëror, për rezistencë dhe çlirim si dhe për shtetndërtimin e Republikës së Kosovës.
Kreu i shtetit tha se UP i themeluar fillimisht mbi 3 fakultete, ndër vite shkoi duke u rritur dhe zgjeruar derisa tani ka 14 fakultete, me dhjetëra departamente dhe dhjetëra programe bachelor, master dhe të studimeve doktorale.
Tutje shtoi se mijëra studentë kanë studiuar dhe janë diplomuar në Universitetin e Prishtinës, teksa i kanë inicuar dhe prirë shumë proceseve shoqërore dhe politike.
Kurti uroi ditëlindjen e 54-të e Universitetit të Prishtinës, studentëve të tij, stafit akademik dhe administrativ, si dhe të gjithë shoqërisë.
Postimi i plotë i tij pa ndërhyrje:
Në 54 vjetorin e Universitetit të Prishtinës
Sot është ditëlindja e Universitetit të Prishtinës! Sivjet, Universiteti i Prishtinës është bërë 54 vjeçar. Ai është institucioni shkollor më i rëndësishëm në historinë moderne të Kosovës, ku janë shkolluar dhe formuar elitat intelektuale, kulturore dhe politike të shoqërisë tonë, që u kanë prirë proceseve për progres shoqëror, për rezistencë dhe çlirim si dhe për shtetndërtimin e Republikës së Kosovës.
Në Kosovë, universiteti u kërkua politikisht në demonstratat e vitit 1968, ku një nga parullat kryesore ishte “Dum Universitet”. Më 18 nëntor 1969, Kuvendi i Kosovës e miratoi Ligjin mbi Themelimin e Universitetit në Prishtinë. Më 13 shkurt të vitit 1970, i zhvilloi punimet Kuvendi i Parë i Universitetit të Prishtinës, ku u ngritën strukturat drejtuese të tij: u zgjodh Pleqësia me 29 anëtarë, u zgjodh rektor Profesor Dervish Rozhaja, si dhe u zgjodhën prorektorë Minir Dushi dhe Bozhidar Jovanoviq. Dy ditë më pas, më 15 shkurt 1970, në një mbledhje solemne u themelua Universiteti i Prishtinës, duke e hapur një epokë të re për jetën universitare, shkencore dhe shoqërore në Kosovë.
I themeluar fillimisht mbi 3 fakultete, ndër vite Universiteti i Prishtinës shkoi duke u rritur dhe zgjeruar derisa tani ka 14 fakultete, me dhjetëra departamente dhe dhjetëra programe bachelor, master dhe të studimeve doktorale. Mijëra studentë kanë studiuar dhe janë diplomuar në Universitetin e Prishtinës, teksa i kanë inicuar dhe prirë shumë proceseve shoqërore dhe politike. Studentët e UP-së ishin zgjues të vetëdijes politike në protestat e vitit 1981, sikur edhe në protestat e viteve 1989 e 1990 dhe në lëvizjen studentore të viteve 1997 dhe 1998; studentët e UP-së ishin ideatorët e lëvizjes për pajtimin e gjaqeve në vitet 1990-’91; studentë të UP-së u bënë luftëtarë të Ushtrisë Çlirimtare të Kosovës; studentë të UP-së ishin firmëtarë të Deklaratës së Pavarësisë së Kosovës më 2008; studentë të UP-së kanë shtruar dhe ndjekur rrugë akademike dhe shkencore të suksesshme në fusha të ndryshme në Kosovë dhe nëpër botë.
E mbarë qoftë rruga dhe udhëtimi i Universitetit të Prishtinës edhe në dekadën e 6-të të tij: me lexime dhe studime; me ligjërata dhe provime; me hulumtime dhe botime; për shkencë dhe dije; për art dhe kulturë; për edukim dhe arsim; për universalen dhe publiken; për shoqërinë dhe shtetin; për progresin dhe mirëqenien; për historinë dhe të ardhmen!
Urime ditëlindja e 54-të e Universitetit të Prishtinës, studentëve të tij, stafit akademik dhe administrativ, si dhe të gjithë shoqërisë sonë! /InLajmi/
