Sekretari shtetëror i Ministrisë së Punëve të Brendshme të Hungarisë, Bence Retvari, tha vendi i tij po dërgon edhe 31 policë në Serbi, transmeton InLajmi.
“Policia hungareze nuk mbron vetëm kufirin e një vendi, por të gjithë Evropën. Policët pranuan një detyrë jo të lehtë, sepse në periudhën e ardhshme do të shërbejnë në seksionin 113 kilometra të kufirit serb dhe Maqedonisë së Veriut, që është drejtimi kryesor i migrimit të paligjshëm”, thuhet në njoftimin e policisë hungareze në faqen zyrtare.
Bashkëpunimi është i vazhdueshëm, tha Retvari, “ky është kontingjenti i 2-të i policëve hungarezë që shërbejnë në Serbi”.
Sipas tij, policia hungareze është e përkushtuar për të parandaluar hyrjen e emigrantëve të paligjshëm në territorin e BE-së dhe për këtë ka ofruar mbështetje për vendet e Ballkanit Perëndimor.
“Detyra kryesore e policisë hungareze është të parandalojë dhe zbulojë kalimet ilegale të kufirit, të patrullojë rrugët në afërsi të kufirit, si dhe të bashkëpunojë për gjetjen e kontrabandistëve të njerëzve dhe emigrantëve të paligjshëm”, tha Retvari.
“Oficerët e policisë hungareze që shërbejnë në Serbi kryejnë detyrat e tyre nën kontrollin dhe mbikëqyrjen e autoriteteve të zbatimit të ligjit të vendit pritës”, shtoi ai, shkruan Danas.
Mediat më herët raportuan se Retvari ka deklaruar se mbrojtja e kufijve hungarez nuk është vetëm çështje e sigurisë publike, por edhe e sigurisë kombëtare. /InLajmi/
