Ministri i Punëve të Jashtme Ivica Daçiq tha se sipas informacioneve jozyrtare që ka, mund të thotë se seanca e Këshillit të Sigurimit të OKB-së për situatën në Kosovë do të jetë e hapur për publikun. Ai tha se Serbia do të përfaqësohet nga presidenti Aleksandar Vuçiq, transmeton InLajmi.
Tutje ka shtuar ai se kemi qenë dëshmitarë të lojërave intensive në prapaskenë dhe presioneve brenda Këshillit të Sigurimit që presidenca e Guajanës të caktojë një seancë të mbyllur, tha Daçiq.
Ministri Daçiq thekson se ka pasur shumë presion që seanca të jetë e mbyllur për publikun.
“Sa i përket vetë procedurës, në këto 2 ditë kemi qenë dëshmitarë të lojërave të ashpra në prapavijë dhe presioneve brenda Këshillit të Sigurimit që presidenca e Guajanës të caktojë një seancë të mbyllur”, shtoi Daçiq.
Ai ka treguar se kërkesën për seancë të mbyllur e kanë arsyetuar me faktin se një gjë e tillë ka ndodhur edhe më parë.
“Është e vërtetë që ka ndodhur, por nga viti 2012 e deri më sot nuk kemi pranuar asnjëherë seanca të mbyllura, sepse nuk kemi arsye për një gjë të tillë”, ka shtuar Daçiq.
Ai deklaroi se zyra e presidentit dhe ministria u përpoqën që përmes kontakteve diplomatike të ushtrojnë ndikim në mënyrë që nëse votohet të kemi një numër të caktuar votash.
Ai theksoi se kryesuesi i Guajanës vendosi nëse seanca ishte e hapur apo e mbyllur për publikun.
“Në fillim ka pasur bisedime dhe disa shtete kanë kërkuar mbylljen e seancës. Ne kemi biseduar me ato vende që nuk e kanë njohur Kosovën, por ngjarja kryesore ka ndodhur pas bisedës që kam pasur me ministrin e Punëve të Jashtme të Guajanës. Ende nuk është njoftuar zyrtarisht, por ai më dërgoi një mesazh ku me tregoi se është pranuar vendimi i Guajanës si kryesuese që seanca e së enjtes do të jetë e hapur”, tha Daçiq në RTS.
Kryediplomati tha se Serbia do të përfaqësohet nga presidenti Aleksandar Vuçiq.
“Mendoj se është shumë e rëndësishme që fjalimi i tij të jetë i dukshëm dhe të gjitha arsyet dhe argumentet se përse kërkuam një seancë urgjente të Këshillit të Sigurimit duhet të shihen dhe dihen nga të gjithë, në mënyrë që të mos mendojnë se kjo është një përpjekje e vazhdueshme për të komplikuar situatën, përkundrazi. Ne ankohemi për shkeljen e Rezolutës 1244, për gjithçka që po ndodh me popullin serb, për terrorin të cilit i ekspozohen ata, duke përfshirë ngjarjet e fundit dhe përpjekjen për shfuqizimin e dinarit“, tha shefi i diplomacisë serbe. /InLajmi/
