Kryeministri i Republikës së Shqipërisë, Edi Rama, ndodhet në Shkup, ku po merr pjesë në takimin e liderëve të rajonit, por dhe zyrtarëve të SHBA dhe BE-së.
Në fjalën e tij në hyrje të takimit, kryeministri tha se takimi është tepër i rëndësishëm për hapat që rajoni duhet të ndërmarrë për t’u afruar me Bashkimin Evropian.
Kreu i qeverisë theksoi se vendet e Ballkani duhet të vendosin interesin e qytetarëve të parin dhe të lënë në plan të dytë historinë, shkruan Euronews.al.
“Është një takim i rëndësishëm pasi jemi këtu për të bërë bashkë mendimet tona me përfaqësuesit e BE dhe SHBA për një hap të rëndësishëm që duhet ta ndërmarrim për tu afruar BE-së diçka që deri tani ka qenë e mundshme vetëm për vendet anëtare. Prandaj është një mundësi e madhe që nuk duhet ta lëshojmë dhe duhet të bashkëpunojmë gjithë 6 vendet e Ballkanit dhe ti vendosim qytetarët në vend të parë e politikën dhe historinë në rend në 2-të sepse çfarëdo që bëjmë në muajt e ardhshëm do të definojë se si do të duken shtetet tona në dekadën e ardhshme”, tha Rama.
