Shefi i Grupit Parlamentar të AAK-së, Besnik Tahiri, pas Mbledhjes së Kryesisë së Kuvendit është shprehur se në vitin 2024 prioritet do të kenë temat që po e rëndojnë jetën e qytetarëve të vendit përcjell InLajmi.
Tahiri tha se çmimet e larta dhe pagat e ulëta janë një ndër fokuset e partisë së tij duke theksuar se nuk ka logjikë që çmimi i energjisë elektrike të jetë kaq i lartë, kur çmimi në tregun ndërkombëtar ka rënë.
Shefi i Grupit Parlamentar të AAK-së përmendi dhe problemin e shtetit tonë të vetëm që për 3 vjet, njihet me problemet që kanë qenë me inflacion, me rritje të çmimeve e mosngritje të pagave.
Ai tutje shton se tash e 3 vjet, qeveria i ka mashtruar në barazi qytetarët e vet, shihet qartë që s’ka barazi, sepse pa qenë anëtar i VV-së s’mund të hysh në punë, as në institucione të pavarura, e as në qeveri.
Postimi i plotë i tij:
Pas mbledhjës së kryesisë theksova se, për grupin parlamentar të AAK-së në vitin 2024 prioritet do të kenë temat që po e rëndojnë jetën e qytetarëve të vendit. Çmimet e larta dhe pagat e ulëta janë një ndër fokuse tona. Nuk ka logjikë që çmimi i energjisë elektrike të jetë kaq i lartë, kur çmimi në tregun ndërkombëtar ka rënë. Kjo qasje është dëmtim i drejtpërdrejtë i qytetarëve.
Çështje tjetër shumë e rëndësishme për ne, ka të bëjë drejtpërdrejt me pagat në sektorin publik. Është i vetmi shtet, që për 3 vjet, njihet me problemet që kanë qenë me inflacion, me rritje të çmimeve e mosngritje të pagave.
Tash e 3 vjet, qeveria i ka mashtruar në barazi qytetarët e vet, shihet qartë që s’ka barazi, sepse pa qenë anëtar i VV-së s’mund të hysh në punë, as në institucione të pavarura, e as në qeveri. Nuk ka barazi në investime komunat e VV-së marrin investime nga buxheti më shumë se të tjerat, nuk ka barazi për pensionistët, për sektorin privat kurr s’ka qenë më keq, e ka bllokuar paranë dhe investimet e buxhetit publik.
AAK-ja do të adresojë të gjitha temat që për neve janë brengë e qytetarëve të Kosovës, me të vetmen arsye që Kosova është kah zbrazet. Është jetike, është veprim kombëtar që të rritet standardi i jetës dhe të ndalet migrimi dhe zbrazja e vendit.
Sa i përket zgjedhjeve, viti 2024 është vit zgjedhor dhe Aleanca në këtë vit zgjedhor hyn më e përgatitur se kurrë. Aleanca do të jetë boshti politik i të gjithë qytetarëve, subjekteve politike të tjera, të koalicioneve të ndryshme, në mënyrë që t’i japim vendimin e duhur kurdo që të mbahen zgjedhjet.
Pres që zgjedhjet të jenë të rregullta, për shkak se nuk ka logjikë, që kryeministri me qeverinë e tij, ta lënë gjithë këtë privilegj, për shkak se mirë e dinë që kurrë më nuk do t’i marrin 50%, andaj ky do të mundohet ta shtyjë deri në fund./InLajmi/
