Të ardhurat nga biletat e shitura në institucionet dhe qendrat e trashëgimisë kanë ardhur duke u rritur nga viti në vit. Sipas të dhënave të bëra publike sot, nga ministrja e Kulturës, Elva Margariti, del se vetëm gjatë vitit 2023 janë mbledhur më shumë se 342 milionë lekë.
Kjo shifër rezulton të jetë 43.22% më shumë se viti 2022 dhe 133.92% më shumë se viti 2021.
Nga biletat në institucione, parqe arkeologjike, kala e monumente kulture, gjatë vitit 2022 u mblodhën rreth 239 milionë lekë, ndërsa në vitin 2021, biletat sollën rreth 146 milionë të ardhura, shkruan ATSH.
“Më shumë shërbime dhe mirëmbajtje në shërbim të turizmit kulturor”, shkroi Margariti, në rrjetet sociale. Ndërkohë që një ditë më parë ministrja bëri publike edhe shifrat e vizitorëve të institucioneve të trashëgimisë kulturore e monumenteve, të cilat vetëm gjatë 2023 ishin vizituar nga më shumë se 1 milionë persona, vendas e të huaj.
