Në një vizitë në “Lagjen 29” në Fushë Kosovë, kryeministri Albin Kurti ka komentuar ankesat e fundit të qytetarëve rreth shtrenjtimit të faturave të rrymës për muajin dhjetor, përcjell InLajmi.
I pyetur nga gazetarët rreth kësaj situate, kryeministri u shpreh se shtrenjtim të energjisë elektrike nuk ka dhe se faturat e larta vijnë si rezultat i konsumimit më të lartë të energjisë. Ndërkohë për sa u përket ankesave, Kurti tha se qytetarët duhet tu drejtohen organizatave kompetente si KESCO dhe ZRRE.
“Nëse ka fatura të fryera, KESCO dhe ZRrE janë adresa të cilat duhet t’i adresojnë me seriozitet edhe me shpejtësi të gjitha ankesat, mirëpo nuk ka shtrenjtim të energjisë elektrike. Kur ka konsum më të lartë natyrisht se ka edhe faturë më të lartë. Shtrenjtim të energjisë elektrike nuk ka”, tha Kurti.
Më tutje Kurti tha se Qeveria ka dhënë ndihma për të përballuar këtë situatë nëpërmjet subvencionimeve. Gjithashtu ai u shpreh se janë duke punuar me ministren e Ekonomisë Artane Rizvanolli që furnizimi me energji të jetë sa më i qëndrueshëm edhe me çmime të përballueshme.
“Ne i kemi subvencionuar, kemi ndihmuar edhe sa i përket pajisjeve efiçente për amvisëri edhe për bizneset në vazhdimësi po përpiqemi maksimalisht me ministren Ekonomisë, Artane Rizvanolli që të kenë furnizim të qëndrueshëm edhe çmime të përballueshme, por shtrenjtim të energjisë nuk ka”, tha ai.
Kryeministri vizitoi “Lagjen 29” në Fushë Kosovë ku u bë përurimi i fillimit të punëve për rregullimin e rrjetit të ujësjellësit në këtë komunë. /InLajmi/
