Komuna e Fushë-Kosovës ka reaguar për ndarjen e buxhetit për investime kapitale për vitin 2024 pas përjashtimit të saj nga ky buxhet, përcjell InLajmi.
Në reagimin zyrtar, ky institucion shprehet se qytetarët e kësaj komune janë ndër taksapaguesit më të mëdhenj dhe e konsideron qasjen e qeverisë të paligjshme dhe diskriminuese e i bën thirrje Presidencës dhe Gjykatës Kushtetuese për të ndërhyrë.
Më tutje në reagim, Komuna deklaron se puna në Fushë Kosovë do të vazhdohet nëpërmjet investimeve vetanake e teksa e përmbyll reagimin duke ironizuar kryeministrin për barazinë e treguar ndërmjet komunave.
Postimi i plotë:
Qeveria e Republikës së Kosovës bën segregacion duke lënë Fushë-Kosovën pa asnjë investim kapital në vitin 2024 *
Komuna e Fushë-Kosovës është anashkaluar në projeksionet buxhetore të Qeverisë së tanishme të Republikës së Kosovës.
Komuna e Fushë-Kosovës është një nga komunat me taksapaguesit më të mëdhenj dhe asnjëherë më parë nuk është përballur me një ndasi politike kaq agresive, me një qasje të tillë skajshmërisht refuzuese për nevojat e investimeve kapitale në dobi të qytetarëve, e cila është e paprecedent në gjithë historinë politike të pasluftës.
Kjo qasje e qeverisë është e paligjshme, diskriminuese dhe në kundërshtim me Kushtetutën, do të ishte e nevojshme ndërhyrja e institucioneve të Presidentit të Republikës së Kosovës dhe Gjykatës Kushtetuese si garantues dhe balancues.
Qeveria duhet të jetë në shërbim të gjithë qytetarëve të Republikës së Kosovës, dhe jo vetëm komunave të linjës së njëjtë politike me Qeverinë.
Edhe përkundër kësaj Komuna e Fushë-Kosovës do të vazhdoj punën përmes investime vetanake dhe do të zhvillohet me ritëm edhe më të shpejtë duke mbetur njëra nga Komunat më të fuqishme në Republikën e Kosovës.
Bravo Kryeministër Kurti kjo është drejtësi, barazi, ndryshimi i madh, rrofsh Kryeministër! /InLajmi/
