Policia e Kosovës bën të ditur se në bashkëpunim me Doganën e Kosovës të premten kanë kryer kontrolle në 2 lokacione në veri ku është hasur një sasi e konsiderueshme e mallit që dyshohet të jetë i kontrabanduar, përcjell InLajmi.
Aksioni i përbashkët në Zhitkovc të Zveçanit dhe hyrje të Leposaviqit ka rezultuar me konfiskim të mallit nga dogana që kryesisht ishin artikuj ushqimorë.
Nga Policia thonë se bashkë me Doganën do të vazhdojë aktivitetet me qëllim që të parandalojnë aktivitete kriminale ndër kufitare.
Njoftimi i plotë:
Policia e Kosovës dhe Dogana e Kosovës, koordinojnë aktivitetet në luftë kundër kontrabandës
Prishtinë, më 11 nëntor 2023
Policia e Kosovës në bashkëpunim e koordinim me Doganën e Kosovës, në vazhdën e angazhimeve operative, në luftën kundër kontrabandës së mallrave dhe aktiviteteve tjera te paligjshme, më 10.11.2023, kanë zhvilluar aktivitet dhe kryer kontrolle në dy lokacione në pjesën veriore të vendit.
Ky operacion i përbashkët ka ardhur pas përpunimit e trajtimit të disa informacioneve se në pjesën veriore të vendit po kryheshin aktivitete të paligjshme. Policia ka kontrolluar një lokacion në Zhitkovc të Zveçanit dhe në një lokacion tjetër në hyrje të Leposaviqit.
Në të 2 lokacionet ku janë kryer kontrolle janë hasur një sasi e konsiderueshme e mallit që dyshohet të jetë kontrabanduar. Dogana e Kosovës e ka konfiskuar mallin që kryesisht ishin artikuj ushqimor, në sasi më të madhe pije alkoolike (birra të brendeve të ndryshme, raki, verë, vodka etj.), por edhe çokolata, coca-cola e gjëra tjera të cilat janë evidentuar një njësitet e doganës (për më shumë shih fotot në bashkëngjitje).
Policia në bashkëpunim me doganën do të vazhdojë aktivitetet me qëllim që të parandalojnë aktivitete kriminale ndër kufitare duke bërë që mallrat që hyjnë në Republikën e Kosovës të jenë të kontrolluara në mënyrë që të jenë të sigurta për konsumimin nga qytetarët, por edhe t’i kalojnë procedurat e tatimeve të parapara sipas ligjeve të vendit.
/InLajmi/
