Ministrja e Ekonomisë, Artane Rizvanolli, ka raportuar në Komisionin për Ekonomi, Industri, Ndërmarrësi dhe Tregti për gjendjen e krijuar në ndërmarrjen “Trepça”, ndërsa ka vënë në theks arritjen e marrëveshjes me minatorët për ndërprerjen e grevës, raporton InLajmi.
Ajo tha se marrëveshja me minatorët është arritur me 2 nëntor duke iu përgjigjur kërkesave të tyre.
Sipas saj greva minatorëve nuk ka qenë e organizuar në përputhje me legjislacionin në fuqi në disa aspekte.
Ministrja Rizvanolli ka thënë se për herë të parë pas 24 vitesh ka pasur edhe raportim të rregullt dhe prezencë të drejtorit të njësisë në veri në mbledhje të Bordit.
“Përgjatë kësaj periudhe ndërmarrja Trepça ka pasur sfida të ndryshme, përveç sfidave të vjetërsisë së pajisjeve dhe sfida tjera në lidhje me burime njerëzore që janë tash e një kohë. Situata ka qenë më e rënduar për shkak edhe të vazhdimit të ndikimit të krizës energjetike, çmimeve shumë më të larta të energjisë elektrike në krahasim me nivelet e para krizës, mirëpo edhe të rënies së çmimeve të metaleve në bursë gjatë këtij viti. Si rezultat ndërmarrja ka qenë në situatë të tillë që ka pasur vonesë të pagesës së plotë të pagës në kohën kur ka filluar greva, përkatësisht gjithë punëtorët e ndërmarrjes kanë pasur të ekzekutuar 55 % e pagës ndërsa 45% të tjera kanë qenë në pritje të subvencionit të qeverisë, subvencion ky që është një ditë para se të fillojë greva”, u shpreh ministrja Rizvanolli
Ajo foli edhe për kërkesën e minatorëve për shkarkimin e ushtruesit të kryeshefit, duke theksuar se emërimi i kryeshefit është kompetencë e bordit.
Nga ana tjetër kryetari i këtij Komisioni, Ferat Shala ka pyetur ministren Rizvanolli për humbjet që ka pasur ndërmarrja “Trepça”, gjatë atyre ditëve sa ka vazhduar greva dhe se cilat njësi janë duke punuar pas grevës.
Ministrja Rizvanolli duke iu përgjigjur këtyre pyetjeve tha se për herë të parë pas 24 viteve drejtori i njësisë së “Trepçës”, në veri ka raportuar në mënyrë të rregullt në mbledhjet e Bordit dhe se Zyra Kombëtare e Auditimit është duke audituar edhe njësinë në pjesën veriore.
Deputetja e LDK-së Valentina Bunjaku, ka pyetur ministren e Ekonomisë se cila është arsyeja e shkarkimit të Bordit të Trepçës dhe emërimi i Bordit të ri.
Ministrja tha se si Qeveri asnjëherë nuk kanë bërë emërime në bazë të favoreve.
Deputeti Pal Lekaj, adresoi kritika ndaj ministres Rizvanolli, sipas tij, ajo i ka injoruar kërkesat e minatorëve dhe se ata janë rrezikuar nga kjo neglizhencë
“Në asnjë mënyrë nuk e kuptoj se si i keni injoruar minatorët, për mos komunikim, mos vizitë të ta i keni rrezikuar gjithë ata minatorë dhe i keni shqetësuar familjet e tyre. Si ndihesh si ministre që me leje e juaj i keni ngujuar minatorë për mos komunikim, mos vendim. Me qenë në pozitën tanë unë kish qajtë nuk kisha qeshur”, tha ai.
Rizvanolli duke iu përgjigjur Lekajt ka thënë se është e turpshme krahasimi i grevës se minatorëve të viteve të 90-ta, me atë të ditëve të fundit./InLajmi
