Në konferencën me titullin “Ndikimi i mekanizmave të sigurimit të cilësisë në krijimin e një kulture cilësore në arsimin e lartë”, organizuar nga Agjencia e Kosovës për Akreditim, Kryeministri i Kosovës, Albin Kurti, tha se prioritet i qeverisjes së tij është cilësia në arsimin e lartë dhe pavarësia e Agjencisë për Akreditim, raporton InLajmi.
Kryeministri shefi i ekzekutivit me synim të ngritjes së cilësisë në arsim përmendi Projektligjin për Arsimin e Lartë dhe atë për Agjencinë e Kosovës për Akreditim.
“Kosova paraqet një rrafsh sesi një universitet e ka prodhuar të gjitha elitat që i kanë prirë të gjitha proceset e Kosovës. E kam fjalën për Universitetin “Hasan Prishtina”. Kjo e tregon sa është e rëndësishme arsimi i lartë dhe cilësia e saj. Cilësia e arsimit të lartë është prioritet i lartë në qeverisjen tonë. Në këto politika janë të rëndësishme marrëdhëniet tona me mekanizmat evropian e ndërkombëtar. Më vjen keq që në vitet e fundit këto marrëdhënie nuk kanë qenë të dëshirueshme, prandaj jemi këtu sot për të ndërtuar ura të re lidhëse”, u shpreh Kurti.
Ndërkohë ka shtuar kryeministri se Agjencia e Akreditimit e ka gjithë pavarësinë për kultivimin e cilësisë në arsim.
“AKA e ka gjithë pavarësinë e saj profesionale dhe aftësinë për kultivimin e cilësisë së arsimit të lartë. Jemi të angazhuar në vazhdimësi, teksa e kemi finalizuar projektligjin për arsimin e lartë. Ligji tjetër që është votuar është votuar është Ligji për Akreditim. E kemi siguruar objektin për Agjencinë, buxhetin gjithashtu dhe i kemi buxhetuar edhe për stafin”, u shpreh kryeministri Kurti./InLajmi/
