Sfidat dhe keqpërdorimet me Fondin e Sigurimit të Kujdesit Shëndetësor, ishin temat e diskutimit në konferencën e organizatave të shoqërisë civile “Të kuptojmë dobësitë e Kosovës në shëndetësi dhe mjedis”, raporton Inlajmi.
Në këtë konferencë u tha se të gjitha institucionet dhe akterët relevant duhet te punojnë për përmirësimin e shërbimeve për qytetarët.
Ambasadorja Nancy Soderberg, drejtoreshë e Lartë Rezidente, e NDI në Kosovë, tha se është shumë me rëndësi që të gjitha institucionet të punojnë për përmirësimin e shërbimeve për qytetarët.
Ajo nuk ka mohuar se po bëhet punë në këtë drejtim, por shprehet se duhet edhe më tepër angazhim.
Për keqpërdorimet në Fondin e Sigurimeve Shëndetësore foli Saranda Ramaj, hulumtuese në Institutin “Columbus”. Sipas saj, 5.5 milionë euro janë shfrytëzuar pa rregull të caktuar dhe për një numër të caktuar të pacientëve.
“Viti 2014 ka qenë Programi që është bërë i njohur e kur Qeveria e atëhershme për fushatë zgjedhore kishte ndarë 5.5 milionë euro për fëmijët e asaj kohe që ishin diagnostikuar me Leukemi.Mungesa e një baze ligjore që ligji apo udhëzimi administrativ e parasheh secili detaj, bëri që këto 5.5 milionë euro të shfrytëzoheshin pa rregull të caktuar dhe për një numër të caktuar të pacientëve dhe kur të shpenzoheshin këto mjete, pacientët dhe fëmijët do të përballeshin sërish me probleme”, u shpreh Ramaj.
Zarko Krtiniq, koordinator i Programit në OJQ “Aktiv”, tha se në Serbi këtë shërbime ofrohen nga Fondi, i cili ofron kompensim monetar për trajtim dhe analiza për të gjitha ata që ofrojnë dëshmi.
“Në Serbi shërbimi ofrohet nga Fondi dhe ka një marrëdhënie të shkëlqyer me organizata të ndryshme. Pacientët mund të shkojnë në Britani të Madhe e SHBA dhe trajtimi duhet të pranohet nga një komision vlerësues i mjekëve”, tha Krtiniq.
Viona Bunjaku, zyrtare e Monitorimit në Lëvizjen “FOL”, tha se në vitin 2022 SHSKUK kishte shpenzuar mbi 24 milionë euro dhe këto shërbime ishin dhënë në kuadër të 251 kontratave të nënshkruara.
“Sa i përket ankesave të operatorëve ekonomik në OShP, në vitin 2021 dhe 2022, ishin adresuar 21 ankesa nga operatorët ekonomik”, tha ajo.
Ndërsa kryetarja e Komisionit për Shëndetësi dhe Mirëqenie Sociale, Fatmire Kollçaku, tha se kanë hartuar një varg rekomandimesh për Ministrinë e Shëndetësisë.
Sipas saj, ka pasur shumë pengesa për shkak të ndërrimit të shumë ministrave.
“Ne si deputet në këtë mandat pas gjetjeve të auditorit, e kemi hartuar disa rekomandime për MSh ku janë listuar defektet dhe si e shohim llogaridhënien që ka munguar. Janë ndërruar disa ministra sepse ne rekomandonim por u ndërronin ministrat. Ne nuk e kemi asnjë mjet në Fond dhe krejt mjetet nga Fondi i sigurimeve bëhet nga buxhetit i shtetit”, tha ajo./InLajmi
