Kryetari i Kuvendit, Glauk Konjufca, derisa bëri homazhe tek Memoriali i të Pagjeturve, tha se Dita ndërkombëtare e personave të zhdukur me dhunë gjatë luftës në Kosovë është “dhimbje që s’përfundon kurrë”, raporton InLajmi.
Sikurse presidentja Osmani edhe kryekuvendari Konjufca kërkoi që ndërkombëtarët t’i bëjnë trysni Serbisë për t’i hapur arkivat.
“Është mungesë e drejtësisë për familjarët e gjithë popullin tonë, të cilëve Serbia ua ka zhdukur me dhunë të dashurit e tyre. Me vetë faktin që viteve të fundit në shumë lokacione në Serbi janë gjetur trupat e të dashurve tanë, tregon që harta ku bashkësia ndërkombëtare duhet t’i kërkojë të zhdukurit me dhunë është Serbia dhe Serbia është shteti ku ndodhen kriminelët që i kanë kryer këto krime”, ka thënë Konjufca, duke shtuar se Kosova duhet ta kryejë punën e vet që ndërkombëtarët të vetëdijesohen se Serbia duhet t’i hapë arkivat. /InLajmi/
