Pas vendimit të Ministrisë së Industrisë, Ndërmarrësisë e Tregtisë ku kanë hedhur poshtë ankesën e Klan Kosovës kundër pezullimit të certifikatës së biznesit të këtij mediumi, kanë ardhur reagime të shumta në lidhje me rastin, përcjell InLajmi.
Ndër ta është edhe reagimi i kryetarit të Aleancës për Ardhmërinë e Kosovës Ramush Haradinaj, i cili ironizoi me Kurtin duke i thënë se nuk mbulohet dielli me shoshë, nuk mbyllen mediat në një vend evropian.
Haradinaj u shpreh duke thënë se Kosova nuk është Kore e Veriut dhe se Kurti duhet të heqë dorë nga ky vendim i çmendur dhe të lërë mediumin në fjalë të kryejë punën e tij.
Tutje ai i bëri thirrje kryeministrit që t’i kërkojë falje popullit e gazetarëve të Klan Kosovës.
Postimi i plotë i tij:
Nuk mbulohet dielli me shoshë o Albin Kurti. Nuk mbyllen mediat në një vend evropian! Nuk jemi Kore e Veriut! Prandaj hiq dorë nga ky vendim i çmendur e lëre Klan Kosovën ta kryejë punën e vet! Dil kërkoju falje popullit e gazetarëve të Klan Kosovës e ruaje pak fytyrë!/InLajmi/
