Ministri i Punëve të Jashtme, Ivica Daçiq, duke komentuar takimin e Presidentit të Serbisë me Sekretarin e Përgjithshëm të NATO-s, Jens Stoltenberg, tha se takimi ishte korrekt dhe se konfirmon se Serbia vërtetë punon për deeskalimin e situates në veri, transmeton InLajmi.
Tutje ka shtuar Daçiq se politikani norvegjez është një njeri që e kupton situatën në Kosovë.
Sipas Daçiqit, Stoltenberg ka krijuar një marrëdhënie shumë korrekte, njerëzore dhe të drejtpërdrejtë me presidentin Vuçiq.
“Biseda ka qenë korrekte, në kuptimin e thirrjes që KFOR të kryejë detyrat që ka. Kjo është me rëndësi kyçe për zhvillimin e mëtutjeshëm të situatës, në mënyrë që të mos vihet në dyshim nëse Serbia dëshiron të de-përshkallëzojë’ tha Daçiq për televizionin Pink.
Daçiq theksoi se nuk është përgjegjësi e Serbisë për deeskalimin, sepse Serbia nuk ka bërë asgjë për ta komplikuar situatën.
Kryediplomati serb kujtoi se babai i Jens Stoltenberg ka qenë në detyrë për shumë vite në Serbi dhe se atij i është dhënë edhe titulli qytetar nderi i Beogradit.
Duke komentuar deklarimin e kryeministrit të Kosovës, Albin Kurti, se do të tërheqë 25% të policisë nga veriu, Daçiq tha se kjo ishte një mashtrim.
“Marrëveshja e Brukselit ka përcaktuar se policia në veri të Kosovës është e përbërë nga serbë, se atje nuk ka polici shqiptare. Çfarë 25%? Asnjë prej tyre nuk duhet të jetë aty”, tha Daçiq për tv.Pink.rs.
Siç vlerësoi ai, tani Marrëveshja e Brukselit dhe të gjitha marrëveshjet e tjera po shkelen rëndë, dhe populli ynë po terrorizohet dhe serbët po arrestohen çdo ditë, shpesh pa prova.
Daçiq u ndal edhe në takimin e së enjtes mes presidentit serb Aleksandar Vuçiq dhe Milorad Dodik, duke thënë se me dekada ka një tendencë që popujt që janë më të vegjël se serbët të kenë komplekse/InLajmi/
