Shqipëria fitoi edhe ndeshjen me Ishujt Faroe. 3-1 rezultati në transfertë me gola mjaft të bukur nga Nedim Bajrami dhe Kristjan Asllani.
Dukshëm kuqezinjtë e dominuan ndeshjen që në fillim. Cikalleshi shënoi në minutat e para, por ishte në pozicion jashtë loje.
Por në minutën e 20 një depërtim në zonë, dhe Jasir Asani pason për Nedim Bajramin që më shpinë nga porta kthehet dhe goditi duke gjetur avantazhin.
Rezultati do të kishte qenë 2-0, por në minutën e 32 fatkeqësisht Sokol Cikalleshi humbi 11-metërshin që fitoi vetë.
Shqipëria pari edhe raste të tjera, por kur nuk shënon do të pësosh dhe kështu ndodhi në fundin e pjesës së parë kur skuadra vendase barazoi në zhvillimet e një goditjeje dënimi.
Të qartë që ishin superiorë, me fillimin e së dytës, futbollistët e Sylvinho-s sulmuan sërish.
Në një goditje nga këndi, Asllani merr një top dhe pranë zonës goditi në mënyrë tejet të saktë duke gjetur cepin e sipërm të portës dhe golin e avantazhit.
Kuqezinjtë zotëruan fushën e lojës prodhuan shumë dhe shpërdoruan shumë raste. Por jo atë të minutës së 91 kur Ernest Muçi kombinoi me Uzunin për të shënuar golin e tretë të ndeshjes. Mesfushori shënon kështu golin e parë me kombëtaren.
Tre gola nga tre mesfushorë sulmues me një lojë të shkëlqyer ekipore më freski dhe ritëm dhe pas këtij suksesi edhe me optimizmin për ndeshjet e Shtatorit, shkruan TvKlan.
Një surprizë ishte fitorja 3-2 e Moldavisë me Poloninë. Në fushën e tyre moldavët përmbysën avantazhin 2-0 të Polonisë duke e favorizuar Shqipërinë që u ngjit në vendin e dytë të grupit E.
