Ministri i financave, Hekuran Murati, ka takuar ministrin e Investimeve të Mbretërisë së Arabisë Saudite, Khalid Al-Falih, nga i cili kërkoi përfundimin e rrugës magjistrale Prishtinë-Mitrovicë.
Në këtë takim, Murati ka theksuar edhe rëndësinë e krijimit të linjave ajrore Kosovë-Mbretëri e Arabisë Saudite dhe anasjelltas.
Sipas një komunikate për medie, Murati ka thënë se ndërtimi i kësaj rruge është shumë i rëndësishëm në përmirësimin e infrastrukturës rrugore.
“Ministri Murati theksoi rëndësinë e mbështetjes nga Mbretëria e Arabisë Saudite për përfundimin e rrugës Prishtinë-Mitrovicë, si objektiv i rëndësishëm infrastrukturor që do të kontribuojë në përmirësimin e infrastrukturës rrugore. Tutje, Ministri Murati theksoi edhe rëndësinë e krijimit të linjave të drejtpërdrejta të fluturimeve nga Kosova drejt Mbretërisë së Arabisë Saudite dhe anasjelltas, që do të ndihmonte në zgjerimin e bashkëpunimit në sektorin e turizmit në mes të 2 vendeve”, thuhet në komunikatë.
Sipas saj, në fokus të bisedës ishte edhe rëndësia dhe nevoja për investime në sektorin e shëndetësisë në Kosovë, ashtu që të përmirësohet infrastruktura shëndetësore dhe të ngritët kualiteti i shërbimeve shëndetësore për qytetarët, shkruan teve1
Nga ana e tij, Ministri Al-Falih bëri të ditur vullnetin e Mbretërisë së Arabisë Saudite për të mbështetur Kosovën me investime në sektorët e lartpërmendur, si dhe sektorë të tjerë të rëndësishëm për zhvillimin e vendit. Ai shprehu përkushtimin e thellë për të forcuar partneritetin ndërmjet 2 vendeve.
