Pas intonimit të himneve shtetërore, në Qendrën sportive “Sezai Suroi” në Prizren, sot u zhvillua ndeshja miqësore në hendboll, ndërmjet vashave të Klubit hendbollistik “Prizreni” dhe atyre të reprezentacionit të Qipros veriore. – shkruan InLajmi
Në kuadër të bashkëpunimit në lëminë e sportit, ndërmjet 2 vendeve mike, para një numri të konsiderueshëm të aderuesve të sportit, hendbollistet prizrenase dhe ato të Qiprose veriore, në Qendrën sportive “Sezai Suroi”, publikut i dhuruan një lojë të shkëlqyer hendbolli duke krijuar një atmosferë të këndshme sportive.
Edhe pse hendbollistet e reprezentacionit të Qipros veriore, ishin dukshëm më të përgatitur, gjatë tërë kohës vashat prizrenase, treguan lojë të mirë dhe si në pjesën e parë ashtu edhe në pjesën e 2-të të lojës, krijuan disa raste për një rezultat të ngusht.
Mirëpo, falë përvojës dhe përgatitjes fizike e teknike, reprezentacioni i Qipros veriore, në pjesën e dytë arriti ta përfundoj këtë takim miqësor me 13 gola epërsi, duke e përfunduar takimin me rezultat 41:28.
Në radhët e hendbollistëve të Qipros veriore lojtarja më e mirë ishte Betul Qanli me 8 gola të shënuara, kurse në ekipin prizrenas u dallua Bora Zejnullahu, me 11 gola të shenuara.
Në fund të këtij takimi miqësor trajnerët; Tarkan Kajash i reprezentacionit të Qipros veriore dhe Fikret Sadiku i KH “Prizreni”, u ndanë tejet të kënaqur me lojën e hendbollisteve të tyre. Osman GORANCI /InLajmi/
