Mali i Zi zhvillon sot zgjedhjet parlamentare. Të drejtë vote në këto zgjedhje kanë 542.468 votues që do të përcaktohen midis 15 listave zgjedhore.
Partia Demokratike e Socialistave për here të parë hyn në zgjedhje pa liderin e saj Millo Gjukanoviq, i cili pas 3 dekadash është tërhequr si lider i partisë, pasi në raundin e 2-të të zgjedhjeve presidenciale humbi zgjedhjet kundrejt rivalit nga Lëvizja Evropa Tani, Jakov Millatoviç.
Por cilat pritet të jenë partitë fituese sipas sondazheve?
Në zgjedhjet e së dielës për të parën herë ka hyrë në garë lëvizja “Evropa Tani”, e cila sipas hulumtimeve ka përkrahjen më të madhe të qytetarëve.
Gjithnjë sipas sondazheve të bëra e 2-ta për nga numri i përkrahësve është “Partia Demokratike e Socialistave”.
Lëvizjen “Evropa Tani” e krijuan ish-ministrat e qeverisë së Zdravko Krivokapiq, Millojko Spajiq dhe presidenti aktual, Jakov Millatoviq. Të 2 këta, njëri në postin e ministrit të Financave dhe tjetri në postin e ministrit të Ekonomisë mbahen mend nga opinion sepse realizuan programin “Evropa Tani 1” që nënkuptoi rritjen e pagave dhe të pensioneve dhe për këtë arsye menjëhere gëzuan popullaritet dhe admirim të jashtëzakonshëm në radhët e qytetarëve të Malit të Zi, shkruan Top Channel.
Në këtë fushatë kjo lëvizje u prezantua me programin “Evropa 2”, e cila po ashtu parasheh rritjen e pagave, pensioneve, mirëqenien e përgjithshme dhe antarësimin e Malit të Zi në Bashkimin Evropian. Edhe pse kjo lëvizje ka kuota të larta në sondazhe, vështirë se ajo do të mund ta formojë vetë qeverinë e re që të jetë e qendrueshme me detyra prioritare, e ta nxjerrë vendin nga kriza shumëvjeçare politike dhe ekonomike dhe të vazhdojë luftën kundër krimit të organizuar dhe korrupsionit.
