Drejtoresha e Kulturës, Rinisë dhe Sportit, Xhemile Murati-Shabani dhe drejtori i Shëndetësisë dhe Mirëqenies Sociale, Kemajl Emini, në një konferencë të përbashkët për medie, kanë shpalosur programin e aktiviteteve të shumta që do të mbahen në muajin qershor, me rastin e shënimit të 150-vjetorit të qytetit të Ferizajt, përcjell InLajmi.
Drejtoresha Murati-Shabani bëri të ditur se që nga 1 qershori do të mbahen aktivitete, duke filluar nga shkolla e baletit “Mjellma”, e cila do të mbajë një organizim në sheshin e qytetit ndërsa më datën 3 qershor do të mbahet festivali për fëmijë ”Fëmijët e Gëzuar” në teatrin e qytetit.
Xhemile Murati-Shabani theksoi se në mesin e aktiviteteve do të mbahet edhe një turne ndërkombëtar i boksit, por do të mbahet edhe koncert koral, shfaqje teatrale, si dhe do të shtrohet edhe sofra tradicionale, e cila do të ketë aktivitete letrare promovuese, manifestim kulturor, konferencë shkencore, ekspozitë kolektive të artit pamor-retrospektive, performancë artistike, festival “Piano fest”, ecje në mal-hiking.
Në kuadër të këtyre aktiviteteve do të shënohet edhe 12 qershori, që është Dita e Çlirimit të Ferizajt.
E nga ana tjetër, drejtori i Drejtorisë së Shëndetësisë dhe Mirëqenies Sociale, Kemajl Emini ka shpalosur agjendën e javës së shëndetësisë.
Aktivitetet për shënimin e 150-vjetorit të qytetit për muajin qershor do të përmbyllen me 16 qershor me hapjen e edicionit të 8-të “Mural Fest Kosova” në sheshin e qytetit, për të vijuar me aktivitete tjera gjatë gjithë vitit. /InLajmi/
