Java Kulturore Greke, e cila nis sot e vazhdon deri në datën 29 maj, fillon aktivitetet e saj nga 3 lokacione të ndryshme: Tirana, Korça dhe Dropulli.
Sot në Tiranë do të performojë këngëtarja Kleoniki Demiri me një koncert të pasur me krijime të kompozitorëve të mëdhenj grekë, në Qendrën Kulturore të Katedrales Ortodokse.
Njëkohësisht në Korçë do të çelet ekspozita e fëmijëve nga shkolla “Omiros”. Pikturë, poezi e kreativitet, premton ky aktivitet për vizitorët të cilët do të kenë mundësinë të shohin botën përmes optikës së fëmijëve. Aktiviteti zhvillohet në Bibliotekën Bashkiake të Korçës dhe do të jetë i hapur për të gjithë.
Po sot, në Dropull artdashësit do të mund të shijojnë një mbrëmje “rebetiko”. Stili i këngëve rebetiko shpreh shpirtin spontan dhe krijues të Greqisë, duke sjellë në skenë artistë, të cilët shprehin botën që i rrethon në vargje e këndim. Kjo traditë e mbrojtur nga UNESCO, vjen në Dropull dhe Finiq, më 23 dhe 24 maj, përmes një grupi të talentuar të këtij stili muzikor me interpretuesit Eirini Vourlaki, Dimitrios Moraitis, Georgios Zafiris dhe Panagiotsi Tsekas, shkruan ATSH
Stafi i Javëve Kulturore Ndërkombëtare premton një javë ndryshe, të mbushur me evente të shumta si, koncerte, ekspozita, gastronomi, sport, kercime popullore, kinema e teatër.
