Në Dubai, firma e arkitekturës ZNera Space ka propozuar një dizajn konceptual që paraqet një strukturë rrethore masive pesëkatëshe të mbështjellë rreth rrokaqiellit më të lartë në botë, Burj Khalifa, i cili ngrihet në një lartësi marramendëse 829.8 metra, pothuajse dyfishi i lartësisë së Empire State Building, transmeton InLajmi.
Koncepti, i njohur si Downtown Circle, bashkon luksin dhe planifikimin urban në një dizajn jashtëzakonisht ambicioz, i cili është sjellë në jetë nga një seri ilustrimeve magjepsëse të krijuara në bashkëpunim me Pictown, një kompani e specializuar në paraqitjet arkitekturore.
Arkitektët kryesorë të ZNera Space, Najmus Chowdry dhe Nils Remess kanë projektuar këtë projekt interesant për ndërtesën më të lartë në botë.
Struktura, e destinuar të ngrihet 550 metra mbi nivelin e rrugës, do të kishte një perimetër prej më shumë se 3 kilometra, shkruan CNN.
Unaza do të mbështetej nga 5 shtylla të mëdha me bazat e tyre të vendosura në zona boshe, që mund të shërbenin për një qëllim shtesë. /InLajmi/
