Më 23 prill, qytetarët me të drejtë vote në 4 komunat në veri të Kosovës, të banuara me shumicë serbe, do t’iu drejtohen qendrave të votimit për të zgjedhur 4 kryetarë të rinj dhe 2 përbërje të reja të asambleve komunale.
Ish-inspektori i Agjencisë Kosovare të Inteligjencës, Shkëlzen Sopjani, ka deklaruar se gjatë kësaj dite mund të ndodhin incidente të vogla, ndërsa tendencat për të ndërprerë zgjedhjet duhen parë sipas mundësive që kanë serbët në veri.
“Incidente të vogla ka me pas, tendenca ka me pas, mirëpo tendencat (për ndalim të zgjedhjeve) duhet me i pa karshi mundësive që i kanë”, ka deklaruar ai.
Ndërkaq, analisti Imer Mushkolaj ka thënë se incidentet nuk i arrijnë barrikadat e kaluara që kishin vendosur serbët në veri.
“Nuk besoj që shkojnë deri aty. Ideja është se tashmë serbët janë frikësuar javë me radhë, nuk është problemi a dalin serbët edhe po dalin këta me i pengu me barrikada. Unë mendoj që ata vec e kanë ndarë mendjen për shka të frikës, për shka të kushtëzimeve që ia ka bërë Beogradi. Ata ndoshta do të kishin dal po të mos i kishin pengesat nga Beogradi”, ka thënë Mushkolaj.
Po ashtu, Sopjani ka thënë se herën e parë që nuk u mbajtën zgjedhjet ishte vendim i duhur dhe sipas tij, zgjedhjet kësaj radhe duhet të mbahen sepse “shteti do të dukej joserioz dhe jashtëzakonisht i dobët”.
“Nëse zgjedhjet nuk do të ishin mbajtur edhe këtë herë thjesht ajo që do të ishte krijuar, do të ishim treguar jo serioz si shtet edhe jashtëzakonisht të dobët. Kështu që zgjedhjet duhet të mbahen”, është shprehur Sopjani, shkruan Dukagjini.
Ndër të tjera, ai ka thënë se sistemi zgjedhor nuk e potencon rendësin e pjesëmarrjes sepse “edhe me një pjesëmarrje shumë jashtëzakonisht të ulët, zgjedhjet janë legjitime dhe të pranueshme”.
