Si ndikon argjërimi në trupin e njeriut, çfarë duhet të konsumojmë e çfarë jo gjatë muajit të Ramazanit?. Këto dhe shumë detaje të tjera i tregon nutricistja Ajshe Ibrahimi në një intervistë ekskluzive për Gazetën InLajmi.
Nutricistja Ibrahimi tregon në hollësi për ushqimet që duhet t’i konsumojmë dhe për ato që duhet t’i shmangim gjatë muajit të Ramazanit, pasi siç dihet, ndryshimi i zakoneve të ushqyerjes në muajin e Ramazanit mund të shkaktojë probleme shëndetësore.
InLajmi: Si ndikon argjërimi në trupin e njeriut?
Ajshe Ibrahimi: Mendohet që abstenimi nga ushqimi mund të ndihmojë në detoksifikimin e organizimit, duke shpërbërë qelizat dhjamore, për t`i përdorur për energji dhe duke çliruar toksina që mund të jenë të depozituara në to. Nëse rregullat ndiqen si duhet, agjërimi mund të ndikojë në uljen e kolesterolit dhe në largimin e peshës së tepërt.
Ndryshimi i zakoneve ushqimore në muajin e Ramazanit mund të shkaktojë edhe probleme shëndetësore, prandaj rekomandohet që të përcillet gjendja shëndetësore e çdo agjëruesi.
InLajmi: Ndryshimi i zakoneve të ushqyerjes në muajin e Ramazanit mund të shkaktojë edhe probleme shëndetësore. Si duhet të ushqehemi që gjendja shëndetësore të jetë stabile?
Ajshe Ibrahimi: Gjatë Ramazanit, nëse ushqimi konsumohet i kombinuar me të gjithë nutrientet e nevojshëm, siç janë proteinat, karbohidratet, vitaminat, fibrat, yndyrat, mineralet dhe uji dhe, nëse merret në mënyrën e drejtë dhe në sasinë e duhur, atëherë trupi nuk do të ndiejë uri.
InLajmi: Çfarë duhet të kemi parasysh gjatë muajit të Ramazanit. Si t’i kombinojmë vaktet për marrjen e ushqimit?
Gjatë periudhës së agjërimit, të gjithë ata që mbajnë Ramazan, ushqehen në 2 vaktet kryesore, siç janë iftari dhe syfyri, por është shumë e rëndësishme rritja e numrit të vakteve, për të mos përjetuar probleme metabolike. Për këtë arsye mundohuni të konsumoni edhe një vakt pas iftarit.
InLajmi: Cilat lloje të ushqimeve ndikojnë pozitivisht në metabolizmin e njeriut gjatë argjërimit?
Ajshe Ibrahimi: Në orët e lejuara për marrje të ushqimit, është e nevojshme të konsumohet ushqimi i cili tretet ngadalë, ushqime të pasura me vitamina, minerale dhe oligo-elemente, të cilat gjinden në pemë dhe perime të freskëta sezonale, te pemët me lëvore, pastaj te pemët e thara, siç janë hurma, kajsia, rrushi, fiku apo kumbullat. Kastraveci është një burim shumë i mirë plotësues për ujin dhe elektrolitët. Bostani e pjepri gjithashtu janë fruta që plotësojnë më së miri nevojat për lëngje, sheqer dhe fibra.
Ushqimet me përmbajtje karbohidratesh, të shoqëruara me sa më shumë fibra dhe ujë, siç janë: tërshëra, elbi, thekra, buka e zezë, makaronat kafe dhe orizi kafe, patatet e vogla me lëkurë, bizelet, fasulet dhe misrat sigurojnë më shumë energji gjatë ditës.
Është e rëndësishme të merren mjaftueshëm lëngje, së paku 8 gota ujë dhe jo vetëm gjatë ushqimit, por edhe në kohën mes vakteve, duke mos anashkaluar as çajrat bimorë.
InLajmi: Cilat pije apo ushqime nuk duhet t’i konsumojmë derisa jemi duke argjëruar?
Ajshe Ibrahimi: Gjatë muajit të Ramazanit nuk duhet të teprohet me kripën, pasi gjatë agjërimit mund të keni etje. Duhet të qëndrohet larg ushqimeve të skuqura dhe produkteve me yndyrë, të kripura apo me sherbet. Nuk rekomandohen pijet e gazuara, sepse kanë ndikim të keq në organizim dhe shkaktojnë pengesa në lukth e zorrë. Gjatë Ramazanit është mirë të ndiqni një regjim të ekuilibruar në 2 vaktet kryesore. Shqipe Vishaj /InLajmi/
