Procesi i legalizimit të mbi 40 mijë ndërtimeve pa leje në Prishtinë po shkon shumë ngadalë. Në komunën e Prishtinës thonë se problemi kryesor i procesit të legalizimit ka të bëjë me çështjet pronësore.
Ndërsa ekspertë të urbanizimit thonë se ky problem do të jetë i gjatë. Por Komisioni Parlamentar për Planifikim, e votoi për lexim të dytë plotësim/ndryshimin e projektligjit të ndërtimeve pa leje. Ndërtime të shumta e të larta mund të shihen lehtë në tërë Prishtinën.
Në komunë deklarojnë se problemi më i madh i këtij procesi janë çështjet pronësore që kanë të bëjnë më objektet e ndërtuara në prona publike dhe private, e që nuk janë në emër të aplikuesve.
Numri i objekteve të legalizuara në Prishtinë është shumë i vogël.
“Numri i certifikatave te legalizimit është diku tek 1.700, por ky nuk është edhe numri i trajtimit te lendeve sepse kemi shume lende te cilat janë trajtuar dhe janë nxjerr vendime për futjen ne listën e pritjes deri ne zgjidhjen e çështjeve pronësore, apo vendime për përfundim te procedurës e te cilat arrijnë shifrën e 1.600 vendimeve”, tha Fatos Dibra, Udhëheqës i Sektorit të Legalizimit, Komuna e Prishtinës.
Për arkitektin Xhelal Llonçari, problemi i pronësisë është shumë i madh.
“Kujtoj që problemi më i madh është abuzimi me parcela, në tokën ndërtimore, janë ndërtua me siguri parcela që nuk janë mbi emër të tyre, janë abuzuar mbi parcelat e shoqërisë etj”. Problem më i madh ndoshta edhe jo subtancial, mendoj është një problem që zgjidhet, është edhe kostoja e objektit”, thotë Xhelal Llonçari.
Qeveria i ka bërë ndryshimet në ligjin për ndërtimet pa leje për ta dinamizuar këtë proces, ndërsa gjatë ditës Komisioni Parlamentar për Planifikim e ka përcjellë për lexim të dytë në Kuvend plotësim/ndryshimin e projektligjit të ndërtimeve pa leje, shkruan RTK.
Në Kosovë janë të evidentuara mbi 350 mijë ndërtime pa leje.
