Djali i heroit të kombit Beqir Gashit, Ismeti, këtë javë vjen në një intervistë ekskluzive për gazetën InLajmi. Se çfarë ndjenje është t’i kushtosh këngë babit i cili ishte hero i kombit e shumëçka tjetër e tregon Ismeti për InLajmin.
InLajmi: Vini nga një familje rapsodësh “Bijtë e Sefes”, të cilët edhe njihen që i kanë dhënë shumë folklorit shqiptar. Si ndiheni që po e vazhdoni traditën e familjes në këngë?
Ismet Gashi: Kënga folklorike tek ne ka filluar prej gjyshit, i cili ka qenë një interpretues i jashtëzakonshem i këngëve kreshnike, por edhe këngëve të tjera që janë përcjellë brez pas brezi deri tek ne. Ne ndihemi shumë me fat dhe krenarë që i përkasim kësaj familjeje që me këngë e pushkë e mbrojti atdheun.
InLajmi: Cila nga këngët që i kanë kënduar paardhësit tuaj e keni më për qejf dhe vazhdoni edhe sot ta këndoni nëpër oda me shumë krenari?
Ismet Gashi: Kënga që na pelqen edhe e këndojmë me më shumë qejf e krenari në oda është kënga “Zakon burri e ka pasë”. Në këtë këngë përshkruhen mjaft mirë zakonet e shqiptarëve, e sidomos besa dhe fjala e mbajtur, si një ndër tiparet që na ka karakterizuar gjithmonë si popull dhe është cilësuar si diçka e shenjtë tek shqiptarët. Është një varg që thotë: Pasha jetën, pasha malet, Burri besës, s’lun kurrë prej fjale…! Pikërisht ky varg tregon më së miri se ne shqiptarët njihemi si njerëz të besës dhe të fjalës.
InLajmi: Kohëve të fundit keni publikuar këngën “Na jem ti”, e cila është dedikim për të gjithë dëshmorët e kombit ashtu edhe për babain tuaj. Sa ka qenë e vështirë për ju të këndoni një këngë që ju prek shumë edhe juve?
Ismet Gashi: Kënga “Na jem ti” ka qenë e vështirë për ta kënduar sepse çdo fjalë është e përjetuar edhe për ne është realitet si për çdo fëmijë dëshmori. Melodinë e këngës e ka bërë Hysni Klinaku ndërsa videoklipin Donart Thaqi, si dhe studio “On Editor”, të cilët i falënderoj për punën e mrekullueshme që kanë bërë.
InLajmi: Teksti i projektit muzikor “Na jemi ti” është shkruar nga Rexhep Selimi, a mund të na tregoni më shumë detaje rreth këngës, si erdhi deri tek ju teksti i kësaj kënge?
Ismet Gashi: Teksin e ka shkruar Rexhep Selimi nga Haga edhe na ka dërguar nëpërmjet një shoku të përbashkët që e kemi. Daja Rexhë njihet si tekstshkrues i jashtëzakonshëm. Ai ka ka shkruar tekste të Mujës dhe të Beqes, këngën “Kreshtat e Kosovës”, që për mua është “Himni i Luftës”. Përveç këtyre këngëve, daja Rexhë na ka shkruar edhe neve tekste, që prej kur kemi qenë të vegjël, e të cilat i kemi kënduar me emocion e krenari.
InLajmi: Këngën e radhës ia keni dedikuar ish-komandantit të UÇK-së Haqif Kadriaj, kush e ka shkruar tekstin e kësaj këngë, si është pritur nga publiku?
Ismet Gashi: Po, ne jemi të nderuar kur këndojmë për njerëz që kanë kontribuuar për çlirimin e atdheut, ashtu siç ishte edhe komandanti i UÇK-së Haqif Kadriaj. Tekstin e këngës e ka shkruar Milaim Islami. Muzikën, orkestrimin dhe incizimin e ka bërë Hysni Klinaku. Videoklipi gjithashtu është bërë nga On Editor.
InLajmi: Çfarë planesh keni për të ardhmen, a jeni duke punuar për një këngë të re?
Ismet Gashi: Po, jemi duke punuar në 3 projekte të reja. Shpresojmë se gjatë këtij viti do t’i lansojmë. Libona Gegaj /InLajmi/
