Që nga viti 2008, kur Kosova e shpalli pavarësinë, atë e kanë njohur 117 shtete në total, por viteve të fundit vendi ynë ka arritur të sigurojë vetëm 5 njohje, çka edhe ka nxitur reagime nga politikanë e analistë për mungesë të lobimit të Ministrisë së Punëve të Jashtme, shkruan InLajmi.
Puna e Ministrisë së Jashtme në aspektin e lobimit si duket ka “stagnuar”, e këtë e tregon më së miri lista e mangët e shteteve të cilat e kanë njohur Kosovën viteve të fundit, por jo vetëm. Edhe Serbia si një indikator direkt ka ndikuar dhe vazhdon të ndikojë në pezullimin e njohjeve të Kosovës.
Partitë opozitare vazhdimisht kanë ngritur zërin për “diplomacinë e brishtë” të Qeverisë Kurti, e cila nuk ka bërë asnjë përparim për 2 vjet në aspektin e lobimit për njohje dhe anëtarësimit të Kosovës në organizata ndërkombëtare.
Zëdhënësja e Partisë Socialdemokrate, Natyra Kuçi, në një deklaratë për InLajmin, thotë se Ministria e Punëve të Jashtme ka prodhuar vetëm skandale dhe asnjë sukses, duke shtuar se anëtarësimi i Kosovës në organizata ndërkombëtare nuk është afruar aspak nga kjo qeverisje.
“Siç edhe po dëshmohet në të gjitha sferat e tjera të qeverisjes, edhe MPJ nuk ka prodhuar ndonjë sukses për t’u përmendur, por skandale, të cilat kanë lënë shenjë të keqe tek çdo qytetarë. Ministrja Gërvalla periodikisht ka prodhuar skandale në shkrimet e saja, në punësimet në ministri dhe sot ka aktakuzë për mosdeklarim të pasurisë fenomen ky që i ka ndjekur edhe disa të tjerë të stafit të saj”, tha Kuçi për InLajmin.
Kuçi konsideron se anëtarësimi i Kosovës në organizata ndërkombëtare është i varur nga dialogu Kosovë-Serbi ndërsa thekson se edhe me marrëveshjen e Ohrit, Kosova nuk ka marrë ndonjë garanci që do të bëhet pjesë e ndonjë organizate, përveç Këshillit të Evropës.
Për më tepër, ajo thotë se përfaqësues nga Qeveria e Kosovës kanë pasur qasje të gabuar sa i përket luftës në Ukrainë, e kjo sipas saj, ka ndikuar që Kosova të largohet edhe më shumë nga prespektiva e anëtarësimit.
“Anëtarësimi i Kosovës në organizata ndërkombëtare, siç është dëshmuar disa herë nga vendimet e atyre organizatave dhe diplomatët e emisarët të emëruar për çështjen e Kosovës, është i varur kryekëput nga dialogu Kosovë-Serbi. Tani, me marrëveshjen e dakorduar në Ohër, Kosova nuk ka marrë asnjë garancion që do të bëhet anëtare e ndonjë organizate, përjashto, ndoshta, Këshillin e Evropës. Krahas mosnjohjes, Asociacionit dhe aspekteve të tjera të dëmshme në këtë marrëveshje, anëtarësimi i Kosovës në organizata ndërkombëtare nuk është afruar aspak nga kjo qeverisje. Bile, mund të argumentohet që këta, me qasjen e tyre të gabuar rreth luftës në Ukrainë, kanë mundur ta largojnë këtë perspektivë anëtarësimi edhe më shumë në të ardhmen”, tha Kuçi.
Kuçi tha se Ministria e Punëve të Jashtme është përcjell vazhdimisht nga skandalet e ambasadorëve që vazhdojnë të jenë aktivë për Kosovën, duke e përmendur ambasadorin Martin Berishaj, për të cilin tha se është i implikuar në korrupsion dhe duhet shkarkuar.
“Siç është përcjellur MPJ me skandale të shumëfishta në qeverisjen e Kurtit dhe ministres së tij, Donika Gërvalla, poashtu kemi parë skandale nga ambasadorët që vazhdojnë të jenë aktivë për Republikën e Kosovës. Skandali më i madh, që ka marrë përmasa ballkanike, është ai i Martin Berishajt. Është jashtëzakonisht shqetësuese qysh kryeministri dhe të gjithë ministrat e tij, një nga një, i kanë dalë në mbrojtje një ambasadori i cili është i implikuar në korrupsion të nivelit të lartë dhe për të cilin i janë ngritur aktakuza në disa vende ballkanike. Shqetësimi nuk është thjesht që ky po e mban pozitën aty por që, nga rezistenca e qeverisë po na lënë të kuptojmë që këta vetë kanë marrë para nga ai. Ky rast do të duhej të hetohej me hollësi dhe ky ambasador tashmë do të duhej të ishte i shkarkuar”, tha ajo.
Zëdhënësja e Partisë Socialdemokrate tha se ministrja Gërvalla ka shkelur rregulloren për pagesën e qerasë së ambasadorëve në disa vende, duke shtuar se disa nga të fundit janë detyruar të kthehen në Kosovë për shkak se nuk kanë mundur të gjejnë banim në përputhje me çmimin e lejuar nga ministria.
“Ndërkohë, siç edhe kanë raportuar mediat, ministrja Gërvalla ka shkelur rregulloren për pagesën e qerasë së ambasadorëve në disa vende e ndërkohë, për ata që nuk i kishte favorit të sajën, siç, bie fjala, për rastin e Viskont Jakupit, ai u detyrua të kthehej në Kosovë brenda 24 orëve sepse nuk mund të gjente banim në përputhje me çmimin e lejuar nga Ministria”, tha Kuçi.
Kuçi theksoi se Qeveria Kurti dhe Donika Gërvalla do të mbahen mend si të zakonshme, ndërsa shtoi se nuk ka parë avansim të Kosovës në sferën ndërkombëtare.
“Pos mirëmbajtjes së marrëdhënieve diplomatike të zakonshme, që është rregull që kanë ndjekur ambasadorët edhe para kësaj qeverie, nuk kemi parë asnjë avancim të dukshëm të Republikës së Kosovës në sferën ndërkombëtare apo në arritjen e marrëdhënieve diplomatike të reja. Qeveria Kurti e Donika Gërvalla do të mbahen mend si të zakonshëm dhe vetëm kaq”, tha ajo.
Nga ana tjetër, anëtarja e Aleancës për Ardhmërinë e Kosovës në Komisionin për Punë të Jashtme, Time Kadriaj, në një deklaratë për InLajmin theksoi se kjo qeveri ka dështuar sa i përket politikës së jashtme, duke shtuar se ky dështim erdhi për shkak të punës së tyre dhe veprimeve “krye në vete”.
“Sa i përket politikes së jashtme kjo qeveri ka dështuar. Në vend të përkrahjes së stafit diplomatik, ne kemi degradim duke filluar tash me Ligjin e ri e të Pagave. Në vend të koncentrimit dhe hartimit të një strategjie si të qasemi dhe t’i caktojmë prioritetet e politikes së jashtme edhe dakordimin edhe me aleatët tonë ne kemi vepruar “krye në vete” dhe kemi bërë veprime te pamenduara, dhe te analizuara që Kosovën e kane kthyer prapa në kohë”, tha ajo.
Sipas saj, shkarkimi i 14 ambasadorëve dhe vonimi i zëvendësimit të tyre ka dobësuar subjektivitetin e Kosovës në arenën ndërkombëtare.
“Shkarkimi i menjëhershëm i 14 ambasadoreve dhe vonimi i zëvendësimit të tyre ka dobësuar subjektivitetin e Kosovës në arenën ndërkombëtare. Si pasojë nuk kemi as një njohje te re e as anëtarësim në asnjë organizatë ndërkombëtare”.
Edhe anëtarja e Partisë Demokratike në Komisionin për Punë të Jashtme, Ariana Musliu-Shoshi, ka kritikuar Ministrinë e Punëve të Jashtme, duke thënë “Në një periudhë mjaft të rëndësishme për Republikën tonë, kur nevojitet punë e madhe siç është lobimi për njohje nga 5 shtetet e BE-së, anëtarësim në organizata nderkombëtare, përforcim i ambasadave tona me staf diplomatik e direktiva të qarta nga qendra, anëtarësimi në organizata ndërkombëtare mbetet vetëm një iluzion ndërsa ka shtuar se ambasadat kanë mbetur gjysmë të zbrazura.”
Sipas saj, ministria është kapur dhe po ngulfatet nga 4-5 persona, ish-zyrtarë të Ministrisë së Diasporës, të cilët siç thekson ajo, këta zyrtarë nuk kanë asnjë lidhje me politikë të jashtme.
“MPJD është kapur dhe po ngulfatet nga 4-5 persona, ish zyrtarë të Ministrisë së Diasporës, të cilët veç me politikë të jashtme nuk kanë asnjë lidhje. Donika Gërvalla është në gjumë e siç duket edhe Albini e ka përjashtu nga kabineti”, ka shkruar Musliu-Shoshi.
Ndryshe, Kosova me një angazhim të tillë vazhdon të mbetet pa anëtarësim në Bashkimin Evropian, Këshillin e Evropës, Organizatën Botërore të Tregtisë, Organizatën Ndërkombëtare të Policisë Kriminale e të tjera. Shqipe Vishaj /InLajmi/
