Për librat e tij, frymëzimin për të shkruar, vështirësitë, pasionin për të shkruar, temat dhe mesazhet që përcjellin poezitë, romanet dhe tregimet e tij, flet në një intervistë ekzkuluzive për InLajmin, autori i mirënjohur shqiptar, Fahredin Shehu.
Shehu është autor i më se 20 librave, i cili për më se 30 vite, shkruan ese, romane, tregim të shkurtër dhe në veçanti shquhet për poezinë me tone filozofiko-mistike. Poezitë e tij janë përkthyer në rreth 30 gjuhë dhe i sollën çmime ndërkombëtare
InLajmi: Sa kohë keni që shkruani, a na tregoni për vështirësitë që keni hasur në fillim?
Fahredin Shehu: Po bëhen 33 vjet nga botimi i librit tim të parë. Është diçka e lindur tek njerëzit kreativ. Edhe nëse do që t’i ikësh krijimtarisë, ajo prapëseprapë do të përcjellë vazhdimisht. Vështirësitë janë pjesë e jetës dhe në krijimtari kjo është edhe më e potencuar. Nuk jam ndalur asnjëherë dhe të gjitha vështirësitë i kam tejkaluar me shumë mund dhe angazhim.
Jam shfaqur si autor në vitet 1990-ta kur kishte vërshim të madh shkruesish, por pak poetë të cilët do te mbeteshin autentik qasjes, mënyrës, qëllimit dhe fuqisë kreative duke e përcjellur vetëm impulsin e vet kreativ, por duke i rezistuar ndikimeve dhe të të ashtuquajturave, “Shkolla Letrare/Artistike”.
InLajmi: Çfarë ju frymëzon vazhdimisht për të shkruar?
Fahredin Shehu: Shkruaj çdo ditë, së paku 3 orë, qoftë ditar, poezi, ese dhe punime shkencore, roman, vështrime për artin pamor, si për arkitekturë, pikturë, disenj i modës apo kritikë letrare.
Më frymëzon JETA, e cila është fenomen më i jashtëzakonshëm, është proces dhe manifestim më i pakumptimtë.
InLajmi: Edhe pse më së shumti shkruani poezi, ju keni shkruar edhe romane dhe prozë poetike dhe tregime. Cilin zhanër e keni më për zemër?
Fahredin Shehu: Në poezi kam arritur inovacion duke mos e përfillur atë që e thashë më lart, asnjë të ashtuquajtur shkollë letrare, por kam krijuar trend ku celebrimi i jetës me të gjithë shumësinë e saj që në vete përmban, e bën autentike dhe njëfarë vule e cila po gdhendet tash e 33 vjet.
A është e lehtë e gjithë kjo?, natyrisht se jo! Po herët e kam kuptuar se duhet punuar dhe se në këtë jetë nuk kemi ardhur në pushim vjetor, por për ta njohur njëri-tjetrin, e kjo arrihet duke e kuptuar fillimisht vetën dhe se si ne i projektojmë të priturat tek tjetri, duke pasur kohën, hapësirën dhe gjithë shenjtërinë e frymëmarrjes.
InLajmi: Cili është mesazhi kryesor i romanit “Nektarina”?
Fahredin Shehu: Nektarina flet për transformimin e njeriut nga një makinë për prodhimin e fëlliqësirave, urrejtjeve, xhelozisë etj., për një njeri i cili i transcendon të gjitha këto nëpërmjet mirësisë, besimit, diturisë, harmonisë dhe balansit.
InLajmi: Për cilat tema shkruani zakonisht në poezitë tuaja?
Fahredin Shehu: Në këto poezi hasen temat e llojllojshme aq sa mund ta përthekojë vetë jeta. Nuk kam kufizime se kujt i pëlqen apo kujt jo, as brengosem se do të zvetnohet e gjithë puna. Puna është ajo që njeriun e bën të dallojë nga faza ameboide për mbijetesë, parazitizmi dhe përtacia.
InLajmi: Cili është elementi kryesor që e dallon poezinë tuaj?
Fahredin Shehu: Shpirtnia. Njeriu gjenetikisht është i ndërtuar që të besojë, shkencërisht kur e mendoj, vetëm një përqindje e vogël gjenesh janë të shfrytëzueshme nga ne, ndërkaq i tërë potenciali njerëzor është përtej asaj që mund të imagjinojë një njeri i rëndomtë. Sepse njeriu i rëndomtë oscilon vetëm në atë përqindje të vetë aplikuese të gjenetikës së tij biokimike e të mos flas për potencialin shpirtëror.
InLajmi: Poezia juaj është përkthyer në 30 gjuhë, të cilat ju kanë sjellë edhe çmime ndërkombëtare, si e arritët tërë këtë punë kolosale?
Fahredin Shehu: Me punë, të cilën e kanë identifikuar në botë, jo tek ne, sepse ne po luftojmë për ekzistencë biologjike dhe është vetëm gjuha ajo, e cila na mban të lidhur me hyjnoren sikur shiriti kordial qe e mban fetusin për nënën deri sa të ndodhë lindja.
InLajmi: A keni ndonjë autor shqiptar apo botëror që ju ka frymëzuar gjatë të shkruarit?
Fahredin Shehu: Natyrisht, për mua shkrimtar më i mirë shqiptar është Martin Camaj, në botë është Tolstoji, por me që bota është shumë e madhe, kam pasur mësues virtual (nga librat e të cilave kam mësuar shumë: Hermes, Imhotep, Bhodisatwa, Milarepa, Ibn Arabi, Ibn Sina, Ahmed Al Buni, Attar, agrippa Von Nettesheim, Meister Eckhart, Vivekananda, Gurdijjeff, dhe në kohë të fundit Gregg Braden dhe Bruce Lipton). Kur flas për poetët janë: Imrul Qays, Hafez dhe po thuaj të gjithë poetët klasikë pers, Tagore, Kabir, dhe ne veçanti Khalil Gibran. Shqipe Vishaj /InLajmi/
