Mërgim Berisha mbrëmë ka debutuar me Kombëtaren e Gjermanisë në një ndeshje miqësore ndaj Perusë.
Berisha në lidhje me këtë është deklaruar krenar dhe i lumtur.
“Nuk e dija që do të hyja. Sigurisht që shpresoja të kisha mundësinë. I jam shumë mirënjohës trajnerit. Dhe u ndjeva shumë mirë. Ishte padyshim diçka shumë e veçantë. Ishte një ëndërr e imja të luaja për Gjermaninë dhe ia kam dalë ta bëj këtë tani”, u shpreh Berisha, i cili është me preardhje nga Kosova.
“Jam mirënjohës për minutat dhe krenar që jam pjesë e këtij ekipi”, tha ai.
Pas 75 minutash, trajneri i kombëtares gjermani Hansi Flick e inkuadroi në lojë sulmuesin e Augsburgut në vend të Niclas Füllkrug, i cili realizoi 2 gola mbrëmë.
“Jam falënderues për minutat. Ishte një fillim i mbarë”, potencoi Berisha, shkruan Klan Kosova.
Kujtojmë, Berisha për një kohë ishte i kontaktuar edhe nga Kombëtarja e Kosovës, por ai në fund zgjodhi të përfaqësojë kombëtaren e Gjermanisë.
