Siguria në punë vazhdon të jetë problem për punëtorët kosovarë. Deri në fund të muajit shkurt, 2 persona kanë humbur jetën në vendin e punës, teksa janë shënuar 51 aksidente. Kështu thonë në Inspektoratin e Punës. Ndërsa, nga Sindikata e Sektorit Privat thonë se numri i të vdekurve në vendin e punës është më i madh.
Si pasojë e kushteve jo të mira dhe sigurisë së pamjaftueshme në punë, vazhdojnë të pësojnë një numër i konsiderueshëm i punëtorëve, me lëndime apo vdekje në vendin e punës.
Këtë vit, deri në fund të muajit shkurt kanë vdekur 2 persona në vend pune, ndryshe nga viti i kaluar. Këtë e ka bërë të ditur kryeinspektori i Inspektoratit të Punës, Hekuran Nikçi.
“Numri i aksidenteve në 2 mujorin e parë të vitit 2023 në tërësi është 51 aksidente, prej tyre 2 kanë përfunduar me vdekje dhe 49 me lëndime. Në vitin 2022, në 2 mujorin e parë kanë ndodhur 40 aksidente në punë”, thotë Nikçi.
“Nga këto aksidente nuk ka pasur asnjë vdekje, të gjitha kanë përfunduar me lëndime”.
Ai tha se ndryshimi i numrit të aksidenteve në këta 2 muaj dhe vitit paraprak është se tani kemi 11 aksidente ma shumë. “Pra, kemi rritje të numrit”, tha Nikçi.
Kryetari i Sindikatës së Sektorit Privat, Jusuf Azemi, thotë se numri i të vdekurve në vendpune është më i lartë, e kjo është mjaft shqetësuese.
“Deri tani, kemi 6 raste të vdekjeve në vendin e punës. Fatkeqësisht ky vit ka filluar shumë keq”, thotë Azemi.
“Ne e kemi analizuar se pse ka ardhur situata deri te kjo”.
Ai tha se meqë një pjesë bukur e madhe e punëtorëve të kualifikuar e me përvojë dhe që e njohin më mirë natyrën e punës veç kanë ikur jashtë vendit, tani pronarët e kompanive po marrin punëtorë të pa kualifikuar.
“Kjo po bënë që shpesh herë punëtorët duke mos njohur natyrën e punës edhe po humbin jetën”, tha ai.
Sindikalisti Azemi tutje thotë se në këtë situatë janë të nevojshëm më shumë inspektorë dhe kontrolle në vende të punës.
Ndërkohë, nga Inspektorati i Punës, kanë treguar se gjatë vitit 2022, numri i aksidenteve në vendin e punës ka qenë 394, shkruan RTK.
Nga këto aksidente, gjatë vitit të kaluar 15 kanë përfunduar me fatalitet.
