Nënkryetari i LDK-së, Lutfi Haziri, ka folur për takimin e 27 shkurtit në Bruksel, që do të mbahet në mes të kryeministrit të Kosovës, Albin Kurti dhe presidentit serb, Aleksandar Vuçiq.
Ai thotë se takimi do të ketë në fokus çështjet që lidhen me marrëveshjet e arritura dhe dokumenti bazë për një marrëveshje pas propozimit evropian, teksa thotë se mbetet që palët të shtyjnë përpara një progres për arritjen e një marrëveshje, teksa thekson se Asociacioni është prag që Kosova nuk mund ta kalojë pa shkaktuar progres.
“Takimi i 27 shkurtit tashmë i paralajmëruar dhe përgatitur nga ndërmjetësi ndërkombëtar në fokus të saj ka çështjet që lidhen me marrëveshjet e arritura dhe dokumenti bazë për një marrëveshje pas propozimit evropian përfundimisht. Pozicionet e palëve janë dhënë në komentet e tyre dhe janë përfshirë në një dokument, i cili tani e tutje mbetet çështje e palëve për të shtyrë përpara një progres në arritjen e një marrëveshje, por draftimi i statutit të Asociacionit të komunave është prag të cilin nuk mund ta kalojë Kosova pa shkaktuar progres, i cili nënkupton që të themelohet grupi punues dhe të fillojë draftimi i statutit”, thotë Haziri.
Sipas tij, kryeministri Kurti po vazhdon të mbajë ende qëndrim për nevoja të brendshme politike, por që negociatat nuk pranojnë kushtëzime dhe duhet fokusuar në arritjen e një marrëveshje të pranuar prej palëve.
“Sa i përket marrëveshjes bazë, është dokumenti të cilin kryeministri e ka pranuar pjesërisht me 2 korrik e ka kushtëzuar por që negociatat nuk pranojnë kushtëzime të palëve por duhet fokusuar në arritjen e një marrëveshje që tashmë është pranuar prej palëve dhe e cila pritet të diskutohet me 27 shkurt. A do të diskutohet nga pika 7 e lart apo nga pika e parë, dokumenti qëndron në tërësi, kryeministri ynë po vazhdon ende të mbajë qëndrim për nevoja të brendshme politike, më shumë se sa ta pasqyrojë realitetin e bisedimeve dhe pritjet që bashkësia ndërkombëtare dhe partnerët kanë”, vlerëson ai.
Sa i përket asociacionit, Haziri thekson se nuk sheh shenja të pranimit të tij dhe se është ende në pikën zero nga Qeveria, me 6 kushtet e kryeministrit Kurti, andaj dhe nuk pret pranim apo nënshkrim të tij, shkruan Gazeta Blic.
“Nuk po shohim shenja të pranimit të draftimit të statutit, edhe më tutje është pozicionimi në pikën zero i Qeverisë së Kosovës sepse me 2 shkurt kryeministri ka thënë se do të jenë 6 kushte nëpër të cilat mund të kalojë Asociacioni dhe procesi negociator duhet të rishikohet. Praktikisht, kryeministri ka kërkuar hapjen e negociatave për ndryshimin e emrit dhe definimin e karakterit të organizimit të asociacionit. Kështu që nuk pres pranim apo nënshkrim të një dokumenti i cili do të shkonte në drejtim të arritjes së një progresi, fundja, kjo nuk ka të bëjë me takim të 27 shkurtit, sepse progresi në këtë çështje duhet të shkaktohet nga Qeveria e Kosovës, jo nga bisedimet”, deklaron Lutfi Haziri.
