Gazetarja e njohur kosovare Alketa Gashi Fazliu para disa ditësh publikoi librin e saj “Ato gdhendin dhimbjen”, shkruan InLajmi.
E këtë të diele Alketa në një intervistë ekskluzive për Gazetën InLajmi tregon arsyet, sfidat e realizimit dhe mesazhin e kësaj triologjie.
InLajmi: Sa orë në ditë shkruani dhe çfarë ju frymëzon vazhdimisht?
Alketa Fazliu-Gashi: Ahh për hir të së vërtetës nuk kam ndonjë llogaritje të kohës se sa orë në ditë shkruaj sepse varion nga frymëzimi dhe detajet e tjera që e plotësojnë procesin e shkrimit por e rêndësishme është që ka ndonjë ditë që shkruaj gjatë dhe ka ndonjë tjetër që nuk jam në elementin e nevojshëm për të bërë diçka! I lë të rrjedhine si frymëzimi si koha si edhe ngjarjet!
InLajmi: Cilët janë zhanret tuaj të preferuar për të lexuar, a keni ndonjë autor/e që e keni si frymëzim?
Alketa Gashi Fazliu: Kam ndryshuar me kohën duket edhe zhanret që më pëlqejnë edhe shkrimtarët që më frymëzojnë! Natyrisht penat e mëdha të letësisë botërore dhe vendase vazhdojnë të mbeten motivim dhe frymëzim i vazhdueshëm për mua por e bukura është se edhe brezi i ri i shkrimtarëve kanë një elan të paparë dhe kreativitet të jashtëzakonshëm për të shkruar! Dikur lexuesit kërkonin autorët por tani duket se autorët duhet të kërkojnë lexuesit e vet!
InLajmi: Cili është mesazhi kryesor i triologjisë “Ato gdhendin dhimbjen”?
Alketa Gashi Fazliu: Krejt teksti i këtij libri rrëfimesh është një materie që sjell për lexuesin një artefakt të dhimbës tragjike dhe lotit të pastër e të buruar prej thellësisë rënkuese të nënave që humbën bij e bija e njëherësh madje edhe disa së bashku.Ky libër është një provë e së thënës së Milan Kunderës për kombet e vegjël të Europës, ndër të cilët përfshihen shqiptarët, e sidomos ata të Kosovës: “Kombet e vegjël formojnë një “Europë tjetër”, evolucioni i së cilës është në kontrapunk me atë të të mëdhenjëve.
InLajmi:Çfarë ju shtyu ta shkruani këtë libër?
Alketa Gashi Fazliu: Rrëfimet e pesëmbëdhjetë nënave të Kosovës në këtë libër janë një dëshmi tronditëse.Janë pasqyrë dhe gdhendje prej shpirti, me fjalën dhe rënkimin mëmësor, për historinë e luftës finale të Kosovës. Rrëfimtaret janë të ndryshme, seicila në karakterin dhe specifikën vetiake të tragjedisë, seicila në një të përbashkët me të gjitha: ndërgjegjësimin flijues të bijve dhe bijave për Kosovën dhe lirinë e saj. Janë dëshmi fjale dhe shpirti për gjakun që imponon rilindjen kombëtare të Kosovës. Kjo është aryeja që unë e krijova këtë trilogji!
InLajmi: Sa ka qenë e vështirë për ju që të mblidhni dhe të dëgjoni rrëfimet e dhimbshme të nënave për triologjinë “Ato gdhendin dhimbjen”?
Alketa Gashi Fazliu: Sigurisht se ka qenë e vështirë! Shumë madje! Shumë! E trishtueshme shpeshëherë! Mallëngjyese gjithëherë! Tronditëse vazhdimisht! Epo, është dashur guxim dhe moral i lartë për ta përballuar! Por ja dola! Jam e lumtur që ja dola!
InLajmi: A keni menduar për librin e ardhshëm?
Alketa Gashi Fazliu: Kam menduar dhe mendoj vazhueshëm për krijimet e mia! Kam në dorëshkrim edhe materiale të tjera që natyrisht pres t’i botoj kur t’u vie momenti! Momantalisht dua që “Ato gdhendin dhimbjen” të ecë mbarë dhe të trokas tek lexuesi ashtu siç kam dashur! Tjerat janë në radhë patjetër! Libona Gegaj /InLajmi/
