Këtë të martë janë bërë 2 vjet, që kur u mbajtën zgjedhjet e përgjithshme, ku Lëvizja Vetëvendosje doli fituese dhe fitoi 50% të votave, shkruan InLajmi.
Gjatë kësaj kohe Qeveria e Kosovës ka numëruar vazhdimisht sukseset e saj, mirëpo është opozita, ajo e cila nuk i ka ndalur asnjëherë kritikat për keqqeverisje.
Nënkryetari i Partisë Socialdemokrate Qëndron Kastrati, në një deklaratë për InLajmin tha se Qeveria e Kosovës gjatë këtyre 2 vjetëve ka tentuar vazhdimisht të censurojë të gjitha institucionet e pavarura.
“Në aspektin e zhvillimit ekonomik, në aspektin e rritjes së mirëqenies, në aspektin e demokracisë dhe të drejtave të njeriut nuk ia ka ba vijë, qysh e patem edhe aksionin sot. Ndërsa këto 2 vjet karakterizohen nga një zell që me u censuru të gjitha institucionet e pavarura të drejtësisë d.m.th. me i marrë në kontroll absolut të gjitha, e kjo natyrisht që është shumë e dëmshme për të ardhmen e vendit. Në asnjë vend në botë nuk ka një tendencë të tillë që me pasë pushtet absolut një lider, i cili i kontrollon institucionet nëse janë ose jo në shërbim të tij”, tha Kastrati.
Kastrati shtoi se gjendja në sistemin shëndetësor dhe në arsim është e rëndë, kjo për shkak të mondërmarrjes së ndonjë veprimi nga ana e Qeverisë së Kosovës.
“U bënë 2 vjet që kur Kurti nuk ka bërë asgjë në sistemin shëndetësor, madje gjendja aty është bërë më e keqe seç ka qenë para 2 viteve dhe kjo vërehet qartë nga largimi i mjekëve, të cilët janë edhe në mungesë. Edhe në arsim Qeveria është munduar me të gjitha mekanizmat që t’i luftojë edhe sindikatat, duke i cenuar të drejtat dhe kompetencat e tyre”, tha ai.
Tutje, nënkryetari i PSD-së thotë se njerëzit veçse e kanë kuptuar se me këtë qeveri nuk ka asnjë ndryshim.
“Uroj që njerëzit veç e kanë kuptuar se krejt kjo nuk është ndryshimi që e kanë pritur, por përkundrazi është veç një ndryshim i njerëzve që kanë me nda torbën e pushtetit”, tha Kastrati.
Ndryshe, PSD ka mbajtur një aksion këtë të martë në 2-vjetorin e Qeverisë së Kosovës, të cilët ngjyrosën me një vijë të verdhë ndërtesën e Qeverisë së Kosovës, që sipas tyre simbolizon se “për 2 vite qeveri, nuk ia kanë bërë vijë”. Shqipe Vishaj /InLajmi/
