Për problemet më të shpeshta të lukthit që hasin shumica e njerëzve, e më konkretisht për shfaqjen e heliobakteries, faktorët, si dhe për trajtimin e saj flet ekskluzivisht për InLajmin profesori universitar njëherësh edhe gastroenterologu Skender Telaku.
Përveç problemeve të lukthit, gastroenterologu Telaku na shpjegon edhe se sa efektiv mund të jetë baloni gastrik për humbjen në peshë, si dhe rreziqet që mund të shfaqen nga vendosja e tij në lukth.
InLajmi: Meqenëse çdo i dyti ankohet me problemet me lukth, çfarë e bën lukthin kaq të ndjeshëm?
Skender Telaku: Problemet nga lukthi janë pasojë e infeksionit me Heliobakter pylori, si edhe ndikimi i barërave të ndryshme mbi mukozën, mbështjellësin e lukthit, sidomos i aspirines dhe i barerave të reumes. Një pjesë e madhe e ankesave nga lukthi kanë të bëjnë me mosmbylljen e lidhgjes, kapakut mes kapërcallit dhe lukthit, e njohur si refluks.
InLajmi: Një ndër problemet që ballafaqohen shumica e njerëzve është edhe shfaqja e Heliobakteries, çfarë shkaktohet më së shumti ky infeksion?
Skender Telaku: Infeksioni me Helikobakter është shumë i përhapur në trojet shqiptare. Helikobakteri shkakton një gamë të gjerë të patologjive në lukth si p.sh. gastritin (pezmatim i lukthit), ulceren peptike (të thatin), limfomen e lukthit dhe së fundi kancerin e lukthit.
InLajmi: Cilët janë faktorët që ndikojnë në përkeqësimin e funksionit të lukthit?
Skender Telaku: Infeksione me Helikobakterien pylori dhe përdorimi i barërave të ndryshme si aspirina dhe barërat e reumes janë faktorët më të shpeshtë që ndikojnë në përkeqësimin e funksionit të stomakut.
InLajmi: Cili është shkaktari kryesor i shfaqjes së Heliobakteries?
Skender Telaku: Infeksioni me Helikobakter është pasojë e ndotjes së ambientit rrethues me këtë bakterie, pra kushtet jo të mira higjienike.
InLajmi: Si mund të trajtohet Heliobakteria?
Skender Telaku:Infeksioni me Heliobakter trajtohet me antibiotikë, si edhe çdo infeksion tjetër bakterial.
InLajmi: Cilat mosha preken më së shumti nga Heliobakteria pylori?
Skender Telaku: Heliobakter pylori prek të gjitha moshat, porse ankesat më të shprehura janë tek moshat e shtyera.
InLajmi: Cilat ushqime ndikojnë në përkeqësimin e gjendjes së lukthit?
Skender Telaku: Kur flasim për ndikimin e ushqimit në lukth, mendohet për ndikimin e ushqimit në refluksin gastroezofageal. Ëmbëlsirat, lëngu i portokallit, limoni, çaji menta, çaj nana, alkooli shtojnë ankesat e refluksit.
InLajmi: Meqenëse kohëve të fundit ka filluar shpeshtimi i vendosjes së balonit gastrik, sa është efektiv për humbjen e peshës?
Skender Telaku: Vendosja e balonit në brendi të lukthit është një nga metodat për humbje të peshës. Kohëve të fundit është shumë në mode. Baloni qëndron në lukth për 6 deri në 12 muaj. Qëllimi është që me zënien e vëllimit të lukthit të ulët ndjenja e urisë. Fatkeqësisht, pas largimit të balonit, disa të sëmurë i kthehen sërish marrjes së pakontrolluar të ushqimit.
InLajmi: Cilët janë rreziqet e vendosjes së balonit gastrik?
Skender Telaku: Para vendosjes së balonit duhet bërë endoskopia me qëllim të identifikimit të ndonjë patologjie, si p.sh. ulcerave të lukthit, të cilat nuk lejojnë vendosjen e balonit. Nëse nuk ka ndonjë kunderindikacion për vendosje të tij, baloni vendoset pa vështirësi. Vjelljet janë të zakonshme pas marrjes së ushqimit të tepërt. Kohëve të fundit në literaturë qarkullonte një raport lidhur me perforimin e lukthit derisa kishte balonin ne lukth.Shqipe Vishaj /InLajmi/
